ВЫЛЬ СӦВЕТЪЯСЛЫ

Коми му кузя бӧръялӧны выль Сӧветъяс. Дзонь во кежлӧ сетӧны крестьяна ассьыныс власьтнысӧ ас костсьыныс бӧрйӧм йӧзлы. Бӧръялӧны медся вежӧра, медся сюсь крестьянасӧ. Тшӧктӧны налы вӧлӧсьтувса удж бура нуӧдны. Ыджыд, сьӧкыд удж босьтӧны бӧрйӧм йӧз. Найӧ ӧд лоӧны вӧлӧсьтын — Сӧвет власьт.

Налы ковмас ставрочмувывса Сӧветъяслысь шуӧмъяссӧ деревняын вӧчны. Ковмас уджавны чорыда мӧвпалӧмӧн да арталӧмӧн — мед эськӧ миян Союзлы бур вӧлі дай мед эськӧ крестьянаӧс оз ло ӧбӧдитӧма. Гырысь уджъяс ӧні Сӧветъяс водзын вӧлӧсьтъясын. Медвойдӧр налы колӧ бура помавны заводитӧм удж — вот чукӧртан удж. Сэсся ӧні быд деревня водзын сулалӧ ӧтитор: став вын пуктыны овмӧс кыпӧдӧм вылӧ. Став Союзлӧн миян овмӧс кыптас, мӧдас став йӧзыслӧн выль бур олӧм, улісяньыс кӧ — сиктъяссянь, грездъяссянь олӧмыс пондас кыптыны. Улысса, медпосни Сӧветъясыс та йылысь мед оз вунӧдны.

Став важнога пемыд олӧмыс пондӧма пасьмунны. Крестьяна босьтчӧны выль олӧмӧ, заводитчӧны кӧртавлыны, лэптыны ассьыныс киссьӧм-разьсьӧм овмӧснысӧ выль кӧртӧдъясӧн. Крестьяна велӧдчӧны выль ногӧн уджавны, выль олӧм вӧчны. Та йылысь оз ков выль сӧветъяслы вунӧдны. НАЛЫ КОЛӦ ЛОНЫ МЕДВОДЗЫН. Быд выльторйыс, быд выль водзмӧстчӧмыс мед петас сӧветсянь. Мед Исполком вӧлі вӧлӧсьтын медбур, медчож уджалысьыс. Йӧзӧс югдӧдан удж — школаяс, нардомъяс; йӧзӧс бурдӧдан удж — больнича, пельшӧр; туйяс, посъяс, быдтор йылысь сӧветлы колӧ думыштны, шуны ассьыс кыв. Му юкӧмъяс, му уджалан машина судзӧдӧмъяс, выль ногӧн му уджавны заводитӧмъяс — оз ӧмӧй быдлаын медвойдӧр кывсӧ Сӧветлы шуны ков?

Выльнога олӧмӧ туйдыны, овмӧс кыпӧдан удж вылӧ ӧтувтны крестьянаӧс — оз ӧмӧй ков Сӧветъяслы? Сӧветъясас ӧд бӧрйӧма нин вӧлӧсьтсьыс медводзын мунысь йӧзӧс. Налы колӧ ӧтувтны ас гӧгӧрас став гӧльджык да шӧркоддьӧма олысь крестьянасӧ, став Сӧвет власьт гӧгӧрвоысьсӧ да сыкӧд ӧтвылысь мунысьяссӧ. Ӧтувтны крестьянасӧ Сӧветъяс бердӧ дай нуӧдны найӧс выль бур олӧмлань.

Туйыс выль олӧмӧ — овмӧс кыпӧдӧм.

Сиам чорыда, бура мунны тайӧ туйӧдыс выль бӧрйӧм сӧветъяслы.