УДОРА

Йӧзлӧн олӧм Удораын абу зэв ошкана. Олӧны вӧр пӧвстын. Му вылын выль лоӧмторъяс йылысь юӧръяс пӧшти оз волыны. Газет судзӧдысь этша, сы понда оз тӧдны, кыдз-мый олӧ йӧз миян Республикаяс Союзын, мукӧд государствоясын. Крестьяна сӧмын тӧдӧны ассьыныс овмӧснысӧ, сэсся немтор. Выль ногӧн олӧмӧ некод оз кутчысь, дай оз кужны кутчысьнысӧ. Волисполкомъяс уджалӧны, кыдз кужӧны: асланыс юр вежӧрӧн. Унаысь торксьывлӧны уджъясас. Йӧз волисполкомъясын уджалысьясӧс омӧля пыдди пуктӧ. Карувса, обласьтувса учрежденньӧяскӧд гижасьӧны шоча.

Крестьяна костын мӧда-мӧдлы отсасян комитетъяс уджалӧны зэв омӧля. На кипод улын немтор абу. Унджык комитетас этша морт на пырӧма, унджыкыс ӧтдортчӧны.

Кооперативъяс уналаын уджалӧны лӧсьыдакодь. Йӧз на дорӧ кутчысьӧ сьӧлӧмсьыс. Важгорт кооператив правленньӧӧ шленъясӧ бӧрйӧм войтыр абу судзсьӧмаӧсь. 1038 шайт да мунӧмаӧсь кытчӧкӧ ставныс. Тӧваръяс, сёян-юанъяс вузалӧны зэв этша, вылӧ дон лэптӧмӧн. Нажӧткаяс абуӧсь, сы понда крестьяна оз вермыны ньӧбасьнысӧ. Деньга ветлӧ зэв омӧля, сы пыдди ньӧбасьӧны ур куяс вылӧ.

Кӧдзаяс таво омӧльӧсь. Ас нянь во гӧгӧр кежлӧ оз судзсьы. Мукӧдлаысь вайӧм нянь зэв дона — 2 шайтсянь 3 шайтӧдз. Вашка ю дорын олысьяс кӧсйӧны петны Кардор губерняӧ. Сэтісянь пӧ тӧварыс, няньыс воӧ донтӧгджык паракодъясӧн, пыжъясӧн.

Колӧ обласьтсянь нуӧдны туйяс, мед водзӧ кежлӧ Удораыд ёнджыка кӧртасяс обласьт дінӧ.

Армейскӧй.