БУР ВОДЗМӦСТЧӦМ
Часын вель нин дыр узисны. Коркӧ тай садьмисны чассаяс, босьтчисны удж вылӧ.
Юль тӧлысьын, 21-ӧд лунӧ, чукӧртчылӧмаӧсь 15 морт, чукӧртчылӧмаӧсь, сёрнитӧмаӧсь дай шуӧмаӧсь восьтыны сельскокӧзяйственнӧй кооперативнӧй тӧварищество «Удж» (Труд). Куим час чӧж мунӧма сёрни тӧварищество йывсьыд. Быдладорсянь видзӧдлӧмаӧсь крестьяна татшӧм ӧтувтчӧм вылад. Ёна збыльысь сёрнитӧны крестьяна, гӧгӧрвоӧны, кыдзи колӧ кыпӧдны крестьяналысь овмӧссӧ.
Ставныс нин найӧ ӧти кывйӧн шуӧны, колӧ пӧ уна пельӧ юкӧмӧн мутӧ уджавны, сӧмын ӧд бара мат — муыд этша, оз тырмы. Весавны кӧ вӧр улысь, выль муяс вӧчны, вывті уна вынсӧ колӧ пуктыны. Машинаяс кӧ эськӧ вӧліны, дерт, кокньыд вӧлі. Ньӧбны кӧ машинаястӧ — сьӧм уна зэв колӧ.
Выль тӧвариществоыдлӧн сьӧмыд сӧмын на мый восьтігас шленъяс пуктісны.
Ковмас удждысьны. Удждӧны во 2−5 кежлӧ сьӧмсӧ. 2−5 вонад ӧдвакӧ тӧварищество вермас ёна паськӧдны уджсӧ да мынтысьны.
Тӧварищество шуис октябр тӧлысьӧдз тайӧ воын вӧчны со мыйяс:
1. судзӧдны вартан да тӧлӧдчан машина,
2. заводитчыны вый да рысь вӧчны машинаясӧн, колясъяснас вердны порсьясӧс.
Мый ковзяс уджсӧ лӧсьӧдігӧн, босьтны уджӧн Кооперативъяс Областнӧй Союзысь — мынтысьны выйӧн.
3. Заводитчыны ӧтвылысь паськӧдны уджалан муяс, мед эськӧ позьӧ вӧлі эновтны куим пельӧ му юкӧмӧн уджаланногтӧ да босьтчыны уджавны квайт пельӧ юкӧмӧн (
Мед бура уджалас выль тӧварищество. Мед оз эновтны сійӧс дзик ас том омӧлик вын вылас кооперативъяс, земотделъяс да лесотделъяс. Мед агрономъяс видлывласны сійӧс.
Отсӧгӧн выль тӧварищество вермас уна бур вӧчны чассаяслы.
Н. С. Е.—П.
