КОМИ КРАСНОАРМЕЕЧЛЫ

Неважӧн на коми йӧз ыстісны ассьыныс пияннысӧ Краснӧй армияӧ. Мунісны том коми войтыр видзны асланыс батьясӧн, вокъясӧн перйӧм, ас киӧ босьтӧм власьт, разӧдчисны СССР пасьтала. Краснӧй армияын том коми войтыр велӧдчӧ, кыдзи кутны киын винтовка, кодӧс дорйыны сійӧн, кыдзи колӧ овны, кыдзи лӧсьӧдны выль, кокни олӧм, асьсӧ ёнмӧдӧ, вынйӧртӧ, ыдждӧдӧ вежӧрсӧ.

Коми красноармееч оз кӧсйы торйӧдчыны аслас чужанінысь, аслас обласьтысь, корӧ ас кывъя гижӧд — газет, коми литература. «Югыд туй» налы ыстыссьӧ. Ыджыд аттьӧ шуасны сыысь коми красноармеечьяс «Югыд туй» редакциялы.

Коми красноармееч! Гиж миян коми газетӧ Краснӧй армияын аслад олӧм йылысь, гиж ас сиктса йӧзыдлы ассьыд велӧдчӧмтӧ, велӧд коми йӧзӧс выльногса олӧмлань мунны, юӧрт найӧс сӧвет власьт йылысь, кыдзи сійӧ кокньӧдӧ крестьяналы олӧм.

Ставным ӧтвылысь отсалам миян пемыд коми йӧзлы петны веськыд туй вылӧ, долыд олӧмлань нуам.

Коми йӧз сьӧлӧмсянь ошкыштасны.