КОМИ АНЬЯСЛЫ

Тайӧ лунъясӧ, дас во войналы тыран лунъясӧ, оз ков вунӧдны тшӧтш коми аньясӧс. Налы ӧд ёна йиджис сійӧ войнаыс. Кыдз сійӧ кольлі ӧтнас мужиксӧ босьтӧм бӧрас, посни одӧжыскӧд (челядьыскӧд), уна аддзыліс сійӧ сьӧкыдлун, тшыглун, уна и синва кисьтіс. Колины уна баба, кодъяслӧн мужикъясыс юрнысӧ пуктісны война вылын — дерт, эз ас вӧляӧн. Тайӧ жӧ лунъясӧ сэтшӧм бабаяслы колӧ артельӧн отсыштны, мед гӧгӧрвоас коми ань, мый абу сійӧс вунӧдӧмаӧсь.

Колӧ шуны коми аньяслы, мед найӧ топыдджыка ӧтувтчасны, мед тэрмасясны ассьыныс юр вежӧрсӧ югдӧдны. Вермас лоны, кыптас бара кось. Мед вермас сэки коми ань тшӧтш ставмувывса эмбуртӧм йӧзыскӧд отсӧг сетны войнасӧ бергӧдны революция туйӧ: кыпӧдны уджалысь йӧзӧс.

Асьныс коми аньяс тайӧ лунъясӧ мед чукӧртчӧмӧн мӧвпыштласны важ кольӧма сир курыд олӧм йывсьыд. Мед сідз жӧ чорыда, кыдзи мужикыс мунӧм бӧрын кутчысисны гӧр юрӧ, кутчысясны ӧні выль олӧм аслыныс дорны.

Эн вунӧд, коми ань, тайӧ лунъясӧ локны демонстрация вылӧ! Тэнад локтӧмыд петкӧдлас, кутшӧм мустӧм тэд вӧлі дас во сайын тайӧ лунъясыс, кор пондіс киссьыны мужикъяслӧн вир, а тіян синва да пӧсь.

К. Т-н.