ОЗ ЛЮБИТНЫ

«Кӧсьта попыд — живӧй черков».

Йӧз сёрниысь.

Коркӧ неважӧн Онтонпи грездын молитчисны, енлысь, шондібанлысь, корисны бур нянь да сов да, бур поводдя да — корисны быд бурсӧ, мый эм му вылас... Ветлӧдлӧны зіб йыв спасъясӧн, ӧбразъясӧн, мургӧны-сьылӧны — гажа; кокыд кӧсйӧ нин йӧктыны (грекысь тай оз пов, трустыд). Ӧшинь увъясӧ петкӧдӧмаӧсь пызан, вылас еджыд пызандӧра, вежа ва тасьті. Виччысьӧны. Бабаяс чукӧртчӧмаӧсь, сёрнитӧны черинянь йылысь, кос чери йылысь, куття йылысь (даддя йывсьыс эз сёрнитны), ляз йылысь... но быдтор йылысь, быдтор йылысь, мый эм паськыд му вылас и мый абу. Кылӧ нин сьылӧм. Керка дас сайынӧсь нин попъясыд — чукыль сайынӧсь, оз тыдавны.

Коркӧ-некоркӧ тыдовтчис зіб йыв спас. Сьӧлӧм быдӧнлӧн ыркмуні — кӧсйис лэбзьыны енэжӧ. Зіб йыв спас... ӧти... мӧд... «Спасъясыс» сэні бергалӧны, гӧгӧрбок видзӧдӧны... Сійӧ нӧ мый на — зіб йыв спасъяс водзын ӧд муніс... (господьӧй енмӧй, эн дивит сійӧс!)... ичӧтик... Кӧсьта поп. Бабаяс Клавдей поп пыдди аддзисны Кӧсьта попӧс, живӧй черковса Кӧсьта поптӧ. Бабаяслӧн ляз йылысь сёрни эштіс, гусьӧникӧн горӧдісны «Кӧсьта поп тай! Кӧсьта поп тай! Кӧсьта поп тай! Кӧсьта поп!» Да сэсся уськӧдчисны пызанъяс дорас, пызандӧра шур-шар, пызанъяс грым-йирк идравлісны: коді пос улас, коді карта вылас — коді кытчӧ удитіс.

Кӧсьта поп муніс, гонькъяліс гӧгӧр — некӧн нинӧм абу кольӧма: мӧд грездӧдз лои мунны коньӧрлы! Сэсся ӧд бӧр петісны пызанъяснад — Клавдей попӧс виччысьны...

Ме, веськыда кӧ шуны, ог жӧ тӧд — код попыс ен дінас матынджык. Клавдейыс эськӧ джуджыдджык весьтӧн кымын Кӧсьтаысь; сувтсӧн кӧ, быттьӧ матынджык ен дінад. Да ӧд бара жӧ вермас Кӧсьтаыд и керка вылӧ кайны... Но мед каяс, колӧкӧ... Тырмас... Сэсся и ӧні вылӧны, молебен сьылӧны, деньгаяс ӧктӧны, веритны тшӧктӧны...

Аддзылысь.