ЛЫАТЫСА ПЕМЫД ОЛӦМ

(Емдін карув, От вӧлӧсьтув)

Лыатыса мӧйму школаысь ӧткажитчисны, сэсся бӧрынсӧ эськӧ и казялісны, лёк пӧ школатӧгыд овныд да, бӧрыннас велӧдысьсӧ абу сетӧмаӧсь: «Сідзи пӧ и колӧ тіянӧс велӧдны, нёль пунт нянь вӧсна эн ӧткажитчӧ школаысь». Лои школатӧг овны дзонь во. Челядь тӧвбыд керкаысь керкаӧ са петкӧдлісны, куритчыны да матькыны велӧдчисны, бурӧ пыдди. Таво колян вося ӧткажитчӧмсьыс каитчӧны, кӧсйӧны бӧр корны школа. Сійӧ школа улас 200 дорысь унджык крестьяниныс, став мортыс лоӧ сюрсӧн-джынйӧн (1.500) морт. Оз позь сы мында йӧзӧс пемыдӧн кольны, йӧзӧс велӧдан удж нуӧданінлӧн колӧ школасӧ сэтчӧ восьтыны.

А пемыдӧсь жӧ нин сэні йӧз. Ӧні неважӧн вӧлі Сыктывкарӧ волӧма сэтчӧс мужик удж корсьны. Кайӧ Коммунистическӧй уличаӧд, кӧрт тув ньӧбны корсьысьӧ. Аддзас ӧшинь пыр ичӧтик ящикъяс да и думайтӧ, тані пӧ оз-ӧ кӧрт тувтӧ вузавлыны. Пырас, пондас кӧрт тув ньӧбны корны. Сійӧс пондасны серавлыны. Вӧлӧмакӧ мортыд лавкаӧ пыдди типографияӧ (нига печатайтанінӧ) веськалӧма. Татшӧм войтырыс вот колян вонад и ӧткажитчывлӧмаӧсь нёль пунт нянь вӧснаыд школасьыд, да таво гӧгӧрвоӧмаӧсь, лёк пӧ олӧм школатӧгыд.

К. Туркин.