МЫЙ КОЛӦ ТӦДНЫ ВЫЛЬ МЕСТАӦ МУНЫСЬЯСЛЫ
Быд лун Наркомземса переселенческӧй отделӧ локтӧны йӧз, ходокъяс, быд местаысь, мӧд-мӧд губерняысь, корӧны разрешенньӧ переселитчыны.
Оз кӧ сэні могмӧдны, найӧ мунӧны нӧшта гырысьджыкъяс дінӧ — президиум ВЦИК-ӧ тӧв. Смидович дінӧ, ӧдйӧ ногӧн корӧны сійӧ жӧ. Медбӧрыннас сідзи и муналӧны гортаныс бӧр куш киясӧн, весь воштӧны пӧра да деньга. Мыйла нӧ оз могмӧдны найӧс?
Кызь вит во сайын важ правительство нуӧдіс Сибырӧ вит миллион душ переселенечьясӧс.
Нӧшта 3−4 во войнаӧдз правительство вӧлі аддзӧ: тыртӧм муыс кольӧ зэв нин этша, но пыр нуӧдіс переселенньӧ. Сійӧ ачыс вӧлі полӧ: крестьянаыс кольӧны кӧ пӧ местааныс — ёнджыка вермасны дӧзмӧдны сарӧс да помещикъясӧс.
Бӧръядорыс правительство кутіс переселяйтны тшӧкыд вӧръясӧ (тайгаясӧ), кос ватӧм степӧ. Переселенечьяс локталісны сэтчӧ, сэсся нинӧм эз кут артмыны да, пышъялісны мӧдлаӧ.
Война водзас Сибырӧ переселитчысьяс пытшкысь коймӧд пайыс бӧр локталісны гортаныс.
Кор Сӧветскӧй власьт кутіс тӧдмавны Сибыртӧ, аддзис: сэні буринъясас ставлаас нин овмӧдчӧмаӧсь, сӧмын кольӧмаӧсь сьӧд вӧраинъясыс; сэтшӧм сьӧд вӧраинсьыс олысьясыс асьныс пышъялӧны.
Но колӧ татчӧ шуны: крестьянствоыд ӧнія пӧраӧ оз зэв сэтшӧма зіль мунны Сибырӧ. Сійӧ думайтӧ мунны Поволжйӧӧ, Кубаньӧ и Украинаӧ. Клӧпӧчитны Украинаӧ мунны оз ков Мӧскуаын, а Харьков пыр, но колӧ сӧмын водзвыв висьтавны: тыртӧм муясыс Украинаас зэв этша. Поволжйӧадтӧ эськӧ некымын губерняясын: Самарскӧй, Саратовскӧй и Царицынскӧйын и мукӧд губерняясын и эм 5 миллион десятина гӧгӧр куш местаясыс. Сэтысь джынйыс колӧ мунны сэтӧн олысь войтыръяслы, мукӧд губерняса переселитчысьяслы кольӧ сӧмын 2½ миллион десятина муыд. Мыйтакӧ эськӧ сійӧ муас бур места эм, сӧмын удж сэні кос степ — сэні муяс зэв сьӧкыд вӧдитны.
Переселенческӧй отдел думайтӧ, мый Поволжйӧӧ, Донӧ и Кубаньӧ 50 сюрс семействоысь уна оз позь переселитны, дай сійӧ оз ло ӧтпырйӧ, а витысьӧн — дас сюрс семейство быд во вылӧ.
Нӧшта эм уна ыджыдджык куш местаяс войвывса губерняясын: Вологодскӧй, Северо-Двинскӧй, Коми Обласьтын. Тайӧ мусӧ позьӧ шуны Сибырса му кодьнад жӧ. Тані зэв сьӧкыда овсьӧ куш ӧти му вӧдитысьлы.
Тані олысь йӧзыс олӧны вӧрса уджӧн да вӧрса прӧмысӧн, мукӧд нажӧткаӧн да. 1923 воас сетлӧмаӧсь заявленньӧяс переселитчӧм йылысь зэв уна нин — 100000 душ. Веськыда кӧ шуны, став переселитчысь йӧзыс лоӧ таысь ёна на уна. Витебскӧй губерняысь пӧ колӧ переселитны 50.000 семейство, Смоленскӧйысь — 60.000 семейство. Сідзтӧ кӧ кык губернясанас и став куш мусӧ тыртны позьӧ, а мукӧд губерняса йӧзыс сідз кольӧны кушӧн.
Крестьянстволы колӧ чорыда тӧдны: переселенньӧыд вермас устроитны зэв этша йӧзӧс, унджыкыслы колӧ кольччыны ас местаясас и кутчысьлыны бурджыка ас мувыв уджас, заводитны петны куим переменасьыд уна переменаӧ — квайтӧ, сизимӧ, сэки вӧлисти ловзян и вунӧдан переселенньӧтӧ.
Попов.
