ПРОФИНТЕРНЛӦН ЧУКӦСТЧӦМ

Прибалтикаын зэв ёна эмбуртӧм войтырӧс дзескӧдӧны, сы понда Профинтернлӧн Конгресс (чукӧртчылӧм) Латвия-Эстония-Польша-Литваса делегатъяс нимсянь чукӧстчӧ ставмувывса эмбуртӧмъяслы со кутшӧм кывъясӧн: «Эстонияын тупкӧмаӧсь став профсоюзсӧ, арестуйтӧмаӧсь сэтысь став гырысьджык юралысьяссӧ. Литваын, Финляндияын, Польшаын быд лун пӧшти тупкалӧны профсоюзъяс да арестуйталӧны юралысьяссӧ. Латвияын дзескӧдӧны жӧ революция профсоюзъяссӧ. Сэтчӧс правительствоясыс шуӧны „демократическӧйӧн“. Сэтшӧм демократияыд арестуйталӧ уджалысь йӧзӧс, быд ногыс суклясьӧ — некыдз оз лэдз котыртчыны сэтчӧс рабочӧй йӧзлы. Охранкаясын уджалысь йӧз вылын быд ногыс нартитчӧны: сӧмын нин бӧрдӧм да лӧвтӧм кылӧ сэтысь.

Ставмувывса тільсьысь-пессьысь войтыр, вӧчӧй протест Прибалтикаса белӧй правительство нартитчӧмлы, нюжӧдӧй кинытӧ сэтчӧс революция уджалысь йӧзлы, отсалӧй нартитӧм-увтыртӧм вокъясныдлы! Англияса-Францияса уджалысьяс, восьтӧй, янӧдӧй став йӧз водзас Макдональдыдлысь да Эрриолысь „рабочӧй“ дай нӧшта „демократическӧй“ правительствояснытӧ — ӧд найӧ тшӧктӧм серти дзескӧдӧны Прибалтикаса уджалысь йӧзсӧ. Вокъяс! Эстония-Латвия-Литва-Финляндия-Польшаса уджалысьяс, чорыда сулалӧй капиталистъясныдкӧд вермасигад — тӧдӧй: тіян дор ӧд олӧ ставмувывса уджалысьыс! Мед му пыр мунасны уджалысь йӧзлӧн палачьясыс! Мед лоас пролетариат революция!»