ПЕМЫД КЫМӦРЪЯС

Неважӧн «Югыд туйын» вӧлі ӧти телеграмма Германияысь. Гижӧма вӧлі: пӧлича пӧ шобӧма оланінсӧ коммунистъяслысь — Рейхстагса депутатъяслысь (Рейхстагыс налӧн — миян Дума кодь кымын учрежденньӧ, сӧмын миян сар вӧлі, налӧн абу). Шобигӧн босьтӧмаӧсь налысь став бумагаяссӧ. Бӧрыннас шуӧма ӧти министр — найӧ пӧ государствонымӧс кӧсйӧны пазӧдны.

Колян лунъясӧ бара ми лыддям: бара шобсьӧны коммунистъяс ордын, пуксьӧдалӧны тюрмаӧ, лыбӧмаӧсь став выннаныс коммунист партия вылӧ...

Неыджыд гижӧдтор: Мекленбургын, Шверинын (каръяс Германияын) тюрмаын асьнысӧ асьныс виӧмаӧсь кык арестуйтӧм коммунист. Асьныс-ӧ асьнысӧ виисны? Ми ёна нин бура тӧдам, мый вылӧ киныс лыбӧ сійӧ йӧзлӧн, кодъяс виалӧны миянлысь ёртъясӧс тюрмаясын «свободнӧй» государствоясын.

Пӧдтыны коммунистъясӧс — со мый йылысь думайтӧ вӧтӧн и вемӧсӧн Германскӧй правительство, со мый йылысь сёрни мунӧ Германия кузя.

Тайӧ ещӧ ӧти кымӧр на Германия вылын. Мӧдыс локтӧ мӧдладорсянь. Правительство кост мунӧ сёрни, сёрниыс петӧ нин йӧз костӧ: кӧсъям кӧ пӧ лӧсьӧдны тӧрговля, тӧвар Германияысь мукӧдлаӧ петкӧдӧм, колӧ пӧ войдӧр государство пытшкас мынтӧдчыны уджсӧ дзуганторъясысь. Сэтшӧм «дзуганторнас» шуӧны буржуазнӧй правительяс 8 часа уджалан лун, код вӧсна уджалысь йӧзыс вермасисны нин уна вояс. Лэдзасны оз бурӧн рабочӧйяс кисьыныс тайӧ вирӧн перйӧм 8 часа уджалан лунсӧ?

Сэккості пондіс бара лыбны дон нянь вылӧ. Бара жӧ уджалысь йӧз вылӧ усьӧ сійӧ лыбӧмыс.

Англия Франциякӧд — Эррио Макдональдкӧд — заптӧны Германиялы вексельяс Версальскӧй договор серти — кӧсйӧны перйыны уджйӧзсӧ. Германскӧй буржуйяс кӧсйӧны мынтысьны рабочӧй да крестьяна вынӧн — уджалан час лыд содтӧмӧн да мыйӧн да.

Ми чайтам, эм на выныс уджалысь йӧзлӧн Германияын. Ми чайтам, оз дыр пондыны видзӧдны нартитчӧм озыр йӧзлысь, пӧрйӧдлӧм налысь гӧль, горшӧдыс топӧдӧм, уджалысь йӧз Германияын.

Сӧвет Республикаса уджалысь йӧз отсаласны налы.