САВИНОБОР

Вӧлӧсьт гӧлиника олӧ. Нянь оз тырмы, вайлісны нин эськӧ да. Колӧ на ещӧ вайны. Мукӧд пӧлӧс тӧвар — ситеч-кӧлуй ли, мукӧдтор, таво эз на волы. Деньгаясыс абуӧсь жӧ — нажӧткаыс эз вӧв.

Олӧмыс йӧзыслӧн зэв рудіник. Ас керка-карта гӧгӧрыс унджыкыс гӧгралӧны. Сӧвет власьттӧ ёна видысьыс абу, ӧткымыныс эськӧ виччысьӧны на важ оланногъяс... Енъястӧ абу на эновтӧмаӧсь. Унджыкыслӧн на юръясас и сьӧлӧмъясас пыдын пукалӧ енмыд.

Общество уджтӧ оз радейтны йӧз. Босьтам кӧть му юкӧм. Во кызь нин сійӧ эз вӧв, сёрнитны — сёрнитӧ сы йылысь быд морт. Менам пӧ со 10 морт вылӧ ӧти десятина, сылӧн пӧ тай куим сёйысь и эм, муыс кык десятина.

Босьтам бара мельничатӧ. Вӧлӧсьтын мельничаыс абу. Пуд нянь кӧ ковзяс изны, лоӧ 150 верст сайӧ мунны. Сёрнитӧм мельнича йылысь уна, вӧчны эз на кӧсйывны. Мыйкӧ пыр сюрӧ — мастер абу ли, деньга абу ли, мый ли.

Волисполком эськӧ уджалӧ, нинӧм шуны. Мый колӧ, быдлунъя уджсӧ вӧчӧ. Водзмӧстчӧмыс, йӧзсӧ удж вылӧ кыпӧдӧмыс абу жӧ. Колӧкӧ, уджалысьыс оз тырмы.

Школаыд ӧд весиг абу. Оз позь шуны — кор нин лоӧ. Челядь кольӧны велӧдчытӧмӧн. Кывсьӧ тай, «10 во тыригкежлӧ Сӧвет власьт пуксьӧмлы бырӧдны став велӧдчытӧмсӧ велӧдӧмӧн». Чайтам, Наробразлы колӧ та йылысь думыштны.

Йӧзӧс югдӧдан удж ньӧтик оз мун. Вӧлӧсьт кузяыс — 145 верст кузя — сӧмын ӧти библиотека эм, дай сійӧ нинӧм оз вермы сетны лыддьысьлы. Зэв этша волӧны йӧзыс. Нардом ни, изба-читальня ни, нинӧм абу. Культурнӧй уджсӧ некӧн нуӧдныс.

ЕПО уджаліс омӧля. Уна уджа вӧлі Обсоюзлы да, тӧварсӧ вӧлі оз сетны. Мыйкӧ гвоздика да мый да вузалӧ жӧ вӧлі. Колан тӧварыс эз вӧв. Ӧні выль правленньӧ бӧрйӧма. Ӧти выль морт сӧмын пырӧма правленньӧас — коммунист. Чайтам, кооперация уджтӧ неуна кыпӧдыштасны.

Коммунист чукӧр зэв ичӧт: 3 шлен да ӧти кандидат. Ставныс воӧм йӧз, служитысьяс. Оз эштыны ли мый ли, крестьяна пытшкын ыджыд удж оз нуӧдны.

Том йӧзлӧн союз абу. Эштан пӧрасӧ омӧля коллялӧны — коді войпук вылӧ мунӧ, коді кытчӧ.

Оз зэв бура ов Савинобор.