ВЫЛЬ ДЕКРЕТ

Крестьяналы колӧ тӧдны выль декрет вошӧм скӧт йылысь. Миян Коми муын гожӧмнад скӧтыд вӧля вылын ветлӧ. Унаысь вошлывлӧ — мунас кытчӧкӧ мӧд грездӧ. Мукӧддырйиыс веськавлас мӧд вӧлӧсьтӧ, дажӧ матысса мӧд карулӧ (уездӧ). Сы понда милициялы, исполкомъяслы да судлы лолывлӧ артавны, кыдз‐мый вӧчны сэтшӧм янсалӧм, йӧз ордӧ веськалӧм, скӧтнас.

Выль декрет та йылысь шуӧ: кодкӧ ордӧ кӧ веськалас, шуам, йӧзлӧн мӧс, сылы колӧ пырысь-пыр жӧ кӧзяиныслы висьтавны. Кӧзяиныс вошӧм мӧстӧ ас ордас босьтас. Вермас лоны сідзи: мортыд оз тӧд, кодлӧн мӧскыд. Сэки сылы колӧ 3 лунъя срокӧ висьтавны мӧс йывсьыд милиционерлы или Исполкомса председательлы. Милиционер пондас корсьны кӧзяинсӧ мӧслысь, сэсся гижас карса милицияӧ. Мӧстӧ сетас Комитет Взаимопомощилы. Комитет, кӧзяин сюртӧдз, видзӧ ачыс либӧ сетӧ кутшӧмкӧ гӧльджык крестьянинлы. Вердӧ мӧстӧ ачыс комитетыс либӧ крестьяниныс, кодлы мӧс сетӧма. Кӧзяин кӧ сюрӧ, мӧстӧ пыр жӧ сылы бӧр сетасны. Сылы лоӧ мынтысьны вердӧмысь да мукӧд рӧскодысь, вӧлі кӧ сэтшӧмыс. Лысьтӧ кӧ, шуам, вӧлі мӧскыс, мыйта доходыс локтіс крестьянинлы — сійӧ доход мындаыс оз ков мынтыны кӧзяинлы вердӧмысь.

Оз кӧ сюр кӧзяиныс, кӧть и корсясны, во мысти (мӧс-вӧв) либӧ кык тӧлысь мысти (посни скӧт) вошӧм скӧт сетсьӧ дзикӧдз комитетлы.

Коді пондас видзны йӧзлысь скӧт, оз вӧч, кыдзи шуӧма, сійӧ мортыс мыжмӧ Уголовнӧй Кодекс 185 статья серти. Статьяыс сійӧ судитӧ во джын кежлӧ мырдӧн уджавны или Исправдомын пукавны.

Сэсся ещӧ кӧзяиныс вермас убыткасӧ перйыны 399 да 400 Гражданскӧй кодекс статьяяс серти.

Милиционерлы кӧ или председательлы висьталасны вошӧм скӧт йылысь, найӧ оз гижны кытчӧ колӧ да оз пондыны корсьны, найӧ мыжмӧны Уг. кодекс 118 ст. серти.

Обисполком вермӧ, декрет серти, вося сроксӧ, код йылысь шуӧма, нюжӧдны воӧн-джынйӧнӧдз.

Тайӧ декретсӧ колӧ бура тӧдны крестьяналы, милиционеръяслы да Исполкомъясын уджалысь йӧзлы.

Б.