КОМИ КРЕСТЬЯНИН!

Ньӧб му-видз уджалан машинаястӧ, коми крестьянин, мезды асьтӧ сьӧкыд уджысь!

Госсельскладӧ воис уна сикас плуг, вартан машинаяс, мукӧд пӧлӧс видз-му уджалан кӧлуй.

Виччысямӧй нӧшта: ытшкан машинаяс, вундан, вундан да кольтаавлан да мукӧд пӧлӧсӧс.

Бӧрынджык воасны кӧдзан, весасян, тӧлӧдчан, няръясян, идзас шыран да мукӧд пӧлӧс машинаяс.

Госсельсклад тӧждысьӧ видз-му уджалӧм бурмӧдӧм йылысь, тӧждысьӧ кыпӧдны, ыдждӧдны, бурмӧдны овмӧс крестьяналысь. Сы вӧсна му-видз уджалан машинаястӧ Госсельсклад сетӧ уджӧн: сельскокӧзяйственнӧй кооперативъяслы, машиннӧй да кредитнӧй тӧвариществояслы, сёрнитӧмӧн, бурӧн лӧсьӧдчӧмӧн.

Машинаястӧ пондасны вузавлыны донтӧгджык сулалан донсьыс. Убыткасӧ кӧсйысьӧ мынтыны Республика. Тадзитӧ ньӧбасигӧн нянь-турун перйӧмыд донтӧмджык сувтас крестьяниныдлы ас вынӧн перйӧм дорысь. Донтӧммас нянь, чинӧ вот.

Чорыда кутчысь, коми крестьянин, машинаяс бердад! Кут пыр тӧд вылад да шу аслыд: «Воттӧ ті, машинаяс, мынтӧй, ме шойччышта!».

Ньӧб машинатӧ, сійӧ — вӧвсьыд бур лоӧ. Вӧлыд ӧд уджалас-уджалас дай мудзас, вердны-юктавны ковмас сійӧс. Машинаыд ньӧтчыд мудзлытӧм, сёйны некор оз кор ни. Сӧмын мазьторйӧн мавтышт, сэсся бара уджав мӧдысь мавттӧдз. Шойччӧг сетны сылы оз ков, абу ловъя лов. Мазьыд во гӧгӧрӧн оз уна мун, вылӧ оз сувт. Вӧвтӧ бур турунӧн, няньӧн да зӧрйӧн вердӧмыд поводнӧй вылӧ сувтӧ. Мӧдарӧ — омӧль кӧрымӧн кӧ вердан, омӧля и уджалас тэд, этша бур ваяс.

Вӧлыд висьмылӧ, доймылӧ, чанясьлӧ, ош сёйлӧ.

Машинатӧ ошкыд оз сёй, кӧть сетан оз сёй. Сӧмын сійӧ торксьыны, жугавны вермас.

Торксьӧм, жугавлӧм машинаясӧс лӧсьӧдавны, дзоньтавны Госсельскладлӧн эм мастерскӧй. Сэтӧні пондасны дзоньтавны, тӧдӧмысь, торъя дон вылӧ. Новлыссьӧминъяс выльдавны пондасны Нювчим заводын. Заводыскӧд сёрнитӧма нин сы йылысь, лӧсьӧдчӧма. Дыр кутны оз пондыны.

Сідзкӧ, коми крестьянин, лӧсьӧд жӧ аслыд му-видз уджалан машинаястӧ, кокньӧд асьтӧ сьӧкыд уджысь. Эн вунӧд, машинаыд сёян-юан ни шойччӧг оз кор, сӧмын мазьтор сылы сетышт да жугалӧмысь видз.

Коми войтыр, ӧтувтчалӧй машиннӧй тӧвариществоясӧ, ӧтувтчӧмӧн ньӧбалӧй му-видз уджалан машинаяс!

Коми войтыр, восьталӧй асланыд вӧлӧсьтъясӧ сельскокӧзяйственнӧй кооперативъяс!

Тӧвариществояслы да кооперативъяслы машинаяс сетсьӧны уджӧн.

Сельскокӧзяйственнӧй машинаяс вылӧ государство сетӧма 5.000.000 зарни шайт.

Коми крестьяна, энӧ узьӧй бур кадын, ӧні жӧ лӧсьӧдалӧй машинаястӧ. Мӧдысь мед оз ло норасьӧм да шуалӧм: «Гырддзаыд пӧ эськӧ матын да, он курччы».

Госсельсклад.