«СЫКОМТЕВЧУК»

Быд тӧлысьын куим ворсантор пуктыны.

Важӧн нин эз кывсьыв «Сыкомтевчуклӧн» (Сыктывдінкарса Коми Театрын ворсысь чукӧр) ворсӧмъяс. Ӧні сэсся бӧр кӧсйӧ кыпӧдчывны. Колян субӧтаӧ вӧлі ворсысьясыслӧн чукӧртчылӧм. Сэні шуисны: босьтчыны прамӧя ворсны, быд тӧлысьын пуктыны куим пьеса. Удж нуӧдны бӧрйисны правленньӧ — куим мортӧс: Нёбдінса Витторӧс (В. Савинӧс), М. Торлоповӧс, П. Покровскӧйӧс. Тайӧ правленньӧ пыр кутас мунны став гижана уджыс; правленньӧ жӧ пондас бӧрйыны пьесаяс: кӧть дасьсӧ ворсны сетны, кӧть роч вылысь лӧсьӧдавны. Бӧрйӧм пьеса сэсся ворсӧм вылӧ сетсьӧ ворсан нуӧдысьлы (режиссёрлы), сэтчӧ бӧрйисны Н. П. Поповӧс.

Ӧнӧдз вӧлі кодсюрӧ полӧны, нинӧм пӧ лоӧ ворсныыс, абу пӧ пьесаясыс. Вӧлӧмкӧ, весь полӧм! Став пьесаыс коми кыв вылас эм сё ветымын кымын, да водзӧ кутас пыр содны — коми гижысьяс отсаласны!

«Сыкомтевчуклӧн» выль правленньӧыс чукӧртчыліс колян вӧскресенньӧӧ. Бӧрйис первой тӧлысь кежлас куим пьеса: медвойдӧр пуктыны «Воддза олӧм» 3 торъя, сэсся «Медбӧръяяс» — 5 торъя, та бӧрын «Нывбабаяс» — Неверовлӧн, 4 торъя.

Дыр ворслывтӧмла ли, мыйла ли, ворсысьясыс зэв ёна водзмӧстчӧны, быдӧн шуӧны: «Вайӧ нин ӧдйӧджык ворсамӧй, сэтшӧма нин ворсӧмсьыс гажъяс быри!»

Медъя, медъя босьтчӧны! Сиам коми ворсысьяслы бура, дугдывтӧг, сьӧлӧмсянь ворсны да Коми мусӧ театр пыр регыдджык югдӧдны!

Ӧ. В.