«ЮГЫД ТУЙ» КРОНШТАДТЫН
Ме служита Гӧрд Армияын, Кронштадтын (крепӧсьт эм Балтийскӧй море ді вылын). Меным воӧ «Югыд туй» газет. Ӧтчыд, декабр 17-ӧд лунӧ вайисны меным «Югыд туй» чӧлӧй ноп (рӧспута вӧсна дыр эз волы да). Сэтӧн жӧ вӧлі ӧтик коми газет (№ 243) ставнас коми! Нимкодьыд менам! Видзӧда водзӧ — сыысь лӧсьыд! Кӧсйӧны став олӧмсӧ Коми мусьыс лӧсьӧдны комиӧн. Ӧдйӧджык котӧрті ёртъяс дінӧ ошйысьны, налы меысь нимкодь лои: «важӧн нин тадзи колі», — шуӧны.
Ми ассяньным бурсиам тайӧ бур заводитӧмлы, коми кыв вӧсна тӧждысьысьяслы, коми олӧм югдӧдысьяслы, медся ёна Нёбдінса Витторлы. Сиам, мед вермасны туй паськӧдны коми кывлы да коми войтырлы!
Сэсся ыстам зэв ыджыд аттьӧ Максим Пролетарскӧйлы миянлы газет ыстӧм пыдди. Надейтчам, водзӧ кутас ыстыны. Тайӧ бурсӧ сылысь ми огӧ вунӧдӧ. Нӧшта кӧ эськӧ морт-мӧд кутасны ыстыны газет миянлы да Обполитпросвет либӧ Коми нига лэдзанін — коми нигаяс, сэсся эськӧ миянлы нинӧм оз и ков! Коми газет да коми нига миянлы тані зэв колантор! Ми кӧсъям тані велӧдчыны ас кывйӧн лыддьысьны-гижны, ас кывйӧн жӧ велӧдны ставсӧ, мый колӧ тӧдны гӧрд салдатлы. Разрешенньӧыс та вылӧ эм нин, сӧмын нигаяс сайын ставыс, ӧти газетыд ставнымлы оз тырмы (ми чукӧрмим морт 50−60).
Гашкӧ, кодкӧ, Обком ли, Обполитпросвет ли, кутшӧмкӧ мукӧд учрежденньӧ ли ыстас. Ми виччысям. Со миян адресыс:
Кронштадтса Политотделын инструктор Г. Корычев.
