ГӦПТОРЪЯС

Гӧпторъяс вӧліны чойясӧн. Чужисны ӧти гыма кымӧрысь гожся зэр бӧрын. Наын ваыс вӧлі ӧткодь, а мыгӧрнас торъялісны. Ӧти гӧпторйыс муніс бобувлань и зэв ёна таӧн вышитчис. Ӧтчыд зэрӧм бӧрын быйкнитіс шонді, и бобув-гӧпторлӧн бордъясыс пондісны пӧртмасьны ӧшкамӧшка рӧмъясӧн. Ошйысьӧмысла сійӧ весиг нӧшта на польдіс. «Медся мичаыс — ме, а тэ — быттьӧ номыр!» — шуис сӧседкаыслы.

Орчча гӧпторйыс вӧлі дзоляник, куйліс канаваын, гож сайын. Шондіыс сы вылӧ эз веськавлы, та вӧсна гӧптор эз югъяв, да и мыгӧрнас збыльысь муніс номырлань. Первойсӧ сійӧ ёна дузъяліс ыджыд гӧптор вылӧ. Но ӧтчыд кыліс нӧшта кодлыськӧ гӧлӧссӧ. Вӧлӧмкӧ, орччӧн мыччысьӧма дзоридз. Дзоридз жармӧма, а слаб вужнас оз вермы судзӧдчыны ваӧдз.

Ыджыд гӧптор вермис эськӧ койыштны дзоридз вылас неуна васӧ, но жалитіс асьсӧ да ассьыс васӧ, кодӧс лыддис вывті донаӧн. А номыр-гӧптор зэв ёна кӧсйис отсавны дзоля петаслы. И кутіс нюжӧдчыны сы дорӧ, писькӧдны муын векньыдик ордым. Сылы дум вылас усис гыма кымӧрлӧн велӧдӧмыс — сэки сійӧ вӧлі войтӧн на: «Ва войт из розьӧдӧ». Кӧть эськӧ тайӧ вӧлі эз чорыд из, а небыд му, но гӧптор лотіс уна вын петас дорӧ воӧдчигӧн. Гӧптор юктӧдіс сійӧс — петас ловзис, нюмсермуніс и воссис аслыспӧлӧс дзоридзӧн. «Аттьӧ тэныд, тэ видзин ме вылӧ став ватӧ! Ӧні ме быдма, ӧд вужйӧй вынсяліс. Верма весиг ачым судзӧдны ва. А тэ, муса гӧптор, писькӧдчы водзӧ. Орччӧн кывтӧ шор, сійӧ вайӧдас тэнӧ ю дорӧдз», — висьталіс «номырлы» дзоридз.

Мусӧ неуна писькӧдыштӧм бӧрын гӧптор паныдасис шоркӧд. Нимкодясигтырйи найӧ ӧтлаын котӧртісны паськыд юлань.

А бобув-гӧптор эз дыр нимкодясь аснас. Пӧсь шонді вӧсна сійӧ дзикӧдз косьмис. Колис сӧмын неыджыдж няйт «нидзув».