ШУД

Вадорса пожӧмлӧн вуджӧр
Артмӧдӧ ты вылын сер.
Кӧть и ми важас бӧр вуджам,
Томмыны сёрмам нин, дерт.

Лун-лун ми уявлім сэтӧн,
Бузӧдчим, кыпӧдім гы.
Синмалім кытыськӧ петӧм
Лӧз юрсигусьяслысь кытш.

Тӧда, зэв тшӧкыда дзугӧ
Йӧзыслысь туйяссӧ кад.
Вӧтӧдны шудыслысь югӧр
Зэв эськӧ вӧлі ме рад.

Вӧр дорӧ топӧдчӧм мышка,
Сир кӧра, ньылӧдӧм, руд —
Пос помсьыс коръяссӧ чышкас
Керка, и разалас ру.

Дивиттӧг, майшасьтӧг, кортӧг,
Важӧн нин пукалӧ тан
Шудыс и виччысьӧ гортас
Миянӧс — авъя да шань.