МУТНӦЙ ДОРЫН. ФЕВРАЛЬ

Уль сынӧдсӧ асывнас тыыс век вайӧ.
И рудӧдӧ мӧдарлаберегас куст.
Йи кызкодь, но ваыс тай надзӧник кайӧ.
И кок туйлӧн вурысыс оз нин и чус.

А енэжыс гулю моз лэбзис нин эстӧн
И бордъяснас малыштіс вӧр-пулысь йыв.
Куш сьӧдӧдӧ йӧрданыс — кынмалӧм крестӧн.
Тан чери оз кыйны, морт гӧлӧс оз кыв.

Тан гожӧмнас вуджӧрсӧ чӧвтлывліс тыӧ
Став куст. Юра кымӧръяс кывтлісны ньӧж.
И вирдаліс ваын буз-базӧдчан шыӧн
То мыш, то кок пыдӧс, то кодлӧнкӧ бӧж.

А ӧнітӧ вӧр-ваыд здукӧн оз паляв.
Февральыс со тэрмасьтӧг лётіктӧ чӧв.
Но медъёна мен черинывъясыс жальӧсь,
Ӧд йи улын узисны кузьсьыс-кузь тӧв.