ЭМБУР СОДӦ — ТӦВАР ДОНТӦММӦ

Сӧвет Республикалӧн эмбурыс пыр вочасӧн содӧ. Воддза воясӧ кӧ сьӧкыд вӧлі овны, ставыс вӧлі киссьӧма, нинӧмӧн вӧлі уджавны — тавоӧдз ёна нин Россия ёнмис, справитчис, кок йылӧ сувтны кутіс.

Овмӧс кӧ содӧ, йӧзлы кокньыдджык овны. Ми тайӧ асьным аддзам, ставным тӧдам. Сӧвет власьт миян — абу озыр власьт, оз син йӧзӧс топӧдны. Кыдз-мый вермӧ пыр ӧтарӧ кокньӧдӧ уджалысь йӧзлысь олӧмсӧ.

Миян государство ӧні тӧждысьӧ унджык тӧвар сетны крестьяналы, мед тӧварыс вӧлі донтӧмджык. Та кузя бура уна нин вӧчис государство.

Ӧні бара вӧчӧма ӧти бур: мед сакар, карасин да сов (колан тӧвар деревняын) вӧлі донтӧмджык, мед крестьяна вермисны тайӧ тӧварсӧ ньӧбны. Госплан шуӧма: сакарысь акциз (казна налог) ньӧти не босьтны, карасинысь акциз чинтыны 25 прӧчент (нёльӧд юкӧн); сэсся кӧрт туй кузя нуӧмысь чинтыны донсӧ: сов вылӧ 30 прӧчент (30 ур быд шайт вылӧ), сакар вылӧ да карасин вылӧ — 25 прӧчент.

Тадзи вочасӧн Сӧвет власьт матыстӧ крестьяналы колан тӧваръяс.