* * *

Ме бара тан, кӧн рӧд да вуж,
Ас чужан муын шудсӧ кӧвта.
Лӧз рытыс сёрнитны оз куж,
Мен сійӧ еджыд кинас ӧвтӧ.

Дзор быгъя енэжыслӧн йир,
Сэсь быгйыс кылалӧ да кусӧ.
Кӧть рыт, но шоныд менам вир,
И ставыс гӧгӧр аттӧ муса.

Зэв вылын вичкоыслӧн юр,
Но сылӧн вуджӧр усьӧ улӧ.
Оз некод челядьдырысь сюр,
А кымынӧс ӧд другӧн шулі.

Во бӧрся ӧдӧбаліс во,
И ёртъяс мунӧмаӧсь ылӧ.
И сӧмын ва эз нинӧм ло,
Пыр мельнича дорын на кылӧ.

И овлӧ, рытыс пуксяс кор
Да чегӧм эжӧр панас сьылан,
Ме Енлысь кора ӧтитор:
Мед быдӧн лючки олас-вылас.