* * *

Кӧн тэ, батьлӧн керка-куд,
Кӧні коркӧ оліс шуд?
Муса дзоридзлӧн лӧз би,
Визув ю да лыа ді.
Кӧн тэ, батьлӧн керка-куд?

Мӧдлапӧлын сьылӧ кай,
Эз на пемды сылы тай.
Куим кодзув юас эм,
Менсьым югдӧдӧны нэм.
Мӧдлапӧлын сьылӧ кай.

Бордъя мельничаыс моз
Кадыс лэдзӧ мулань пос.
Сэсянь кисьтӧ енэж сер
Олан здукъясыслысь зэр.
Бордъя мельничаыс моз.

Тайӧ зэрыс, ньӧвйӧн тыр,
Керка-кудйӧс пасьйис пыр,
Пӧдтіс дзоридзӧйлысь би,
Вӧйтіс зарни лыа ді.
Тайӧ зэрыс, ньӧвйӧн тыр.