ПОН ЙЫЛЫСЬ СЬЫЛАН

Асывнас идзас сайын,
Дзебсьывлам кытчӧ ми,
Сизимӧс сука вайис,
Сизим дзик рыжӧй пи.

Рытӧдзыс найӧс нюліс,
Шыльӧдіс вазьӧм гӧн.
Сыліс пӧсь кынӧм улас,
Вӧлыштіс лымйыс кӧн.

А рытнас, кор узьны туйӧ,
Кор курӧглы муса сёр,
Ставнысӧ мешӧкӧ сюйис,
Локтіс кӧзяиныс кор.

Лым вывті бӧрсяньыс вӧтчис,
Суӧдны вермис и эз...
Эжӧрӧ бура дыр нӧйтчис
Шызьӧдӧм ваыслӧн вез.

Гортас кор бӧрсӧ нин кыссис,
Тшӧктіс на мӧвпыштны вем:
Тӧлысьыс пач труба вывсьыс —
Пиыс ӧд сылӧн и эм.

Кӧтасьӧм кодзувъяс пырыс
Видзӧдіс сійӧ вель дыр.
Тӧлысьыс вочасӧн бырис,
Сайӧдіс мышкунас кыр.

Кӧдзаліс шонавтӧм позйыс,
Тыдалӧ, сэтчӧ оз ин.
Зарниысь кодзула гозйӧ
Понйыслӧн гӧгыльтчис син.