* * *

Ставным сэтчӧ вочасӧн ми мунам,
Кӧні лӧнь, дзик ставыс кӧні бур.
Гашкӧ-й, меным ковмас ӧти лунӧ
Кӧлуй шойӧн сылань вӧчны юр.

Менам муса, югыд кыддза расъяс!
Муӧй менам! Лыа нӧрыс бок!
Йӧзлӧн кыз му улӧ мунан часас
Менӧ босьтӧ чепӧльтана шог.

Ставыс меным вывті муса вӧлі,
Вӧльнӧй светас мыйысь кыпыд лов.
Видза кольӧй, пуясӧй, ю пӧлӧн,
Ог нин уна тіянкӧд ме ов.

Уна мӧвп мен вежӧрӧдзым воліс,
Уна сьылан чужтіс менам юр.
Шуда ме, мый лолалі да олі,
Кӧть и шогыс эз жӧ этша сюр.

Шуда ме, мый кутлі уна нылӧс,
Сьӧлӧм пытшкысь ӧзті муса би,
Ӧкті дзоридз, тупляси видз вылын,
Но эг некор зверӧс нӧйт ни ви.

Тӧда ме, мый абуӧсь сэн расъяс,
И оз копрась юсь голя моз сю.
Сы вӧсна и гуӧ мунан часас
Йирмӧг босьтӧ, мый кӧть сэсся шу.

Тӧда ме, сэн абу енэж лӧзыс, 
Абу мулӧн зарни рӧма бан. 
Сы вӧсна и донаӧсь мен йӧзыс, 
Кодъяс мекӧд му вылынӧсь тан.