К-лы

Оз некор вунлы сійӧ здукыс,
Тэ синъяс водзам петін кор.
Кыдз вӧт ли вемӧс кыськӧ тшукин,
Кыдз некысь аддзывлытӧмтор.

Кор сьӧкыд вӧлі сьӧлӧм вылын
Да шогсьыс некоді эз видз,
Ме тэнсьыд муса гӧлӧс кылі
Да вӧтӧн аддзи югыд мич.

Кад муніс, бушков сора вӧлі,
Мый йиджис сьӧлӧмӧ, эг видз.
И вуніс тэнад муса гӧлӧс
Да дзебсис енэжшӧрса мич.

Сьӧд парма сайын, йӧзсянь ылын
Лун бӧрся ньӧжйӧ кыссис лун.
Ме бордтӧм лолӧн олі-вылі,
Эг муслун ордымъясӧд мун.

Но воис колипалан здукӧй,
Тэ бара петін меладор.
Кыдз вӧт ли вемӧс кыськӧ тшукин,
Кыдз некысь аддзывлытӧмтор.

И сьӧлӧм бара биа лола,
И сійӧ тӧдны кутіс бӧр
И синва кӧр, и райӧ волӧм,
И Ен, и мусукасян йӧр.