МЫЙЛА ГОЖӦМБЫД ШВУЧКӦ ВОЙ ТӦВ

Уна йӧз шензьӧны, мыйла пӧ гожӧмбыдӧн пондіс сулавны ӧти пӧлӧс поводдя. Мӧйму лэдзавлытӧг зэрис, таво лэдзавлытӧг швучкӧ вой тӧв, локтан во, гашкӧ, кымӧрсӧ огӧ аддзывлӧ да...

Ӧнӧдз ми огӧ вӧлі тӧдӧ, мый вӧсна татшӧм дивӧясыс. Вӧлӧмакӧ, зэв кокньыд тӧднытӧ, оз бара ков юасьны велӧдчӧм йӧзлысь да кывзыны налысь «сӧрӧмсӧ», кыдз миян пемыд йӧз шуасны. Сӧмын колӧ видзӧдны май 14-ӧд лунӧ, кутшӧм поводдя лоӧ сійӧ лунын, сэтшӧм поводдя пондас сулавны гожӧмбыд. Сійӧ луннас вӧлӧма святӧй Сидӧрлӧн нимлуныс. Кутшӧм поводдя ковмас Сидӧрлы нимлунсӧ величайтны, сэтшӧм поводдя и лӧсьӧдас арӧдз. Со мыйта вӧлӧма святӧй Сидӧрыдлӧн выныс. Вот мун дай тӧд, кысь нин бара велӧдчӧм йӧзлы Сидӧркӧд вермасьны...

Тадзи сёрнитӧны Сыктывкаргӧгӧрса олысь пемыд йӧз. Ог тӧд, кор нин найӧ неуна кутасны юрвежӧрасьны, асьныс ӧд ещӧ олӧны кар бердын. Тырыс дурисны Степан вичко тупкӧм понда, быд чудесасӧ вӧлі висьтавласны. Ӧні Степан вичко восьтісны — кыпӧдӧны кутшӧмкӧ Сидӧрӧс, Сидӧр бӧрын кыпӧдасны Маринӧс, да уна на святӧйыд сюрас, абу ӧд этша пемыд йӧзыдлӧн святӧйыд.

Вой тӧв.