МЫЙЛА ГАЗЕТЫД СЁРӦН ЛОКТӦ

Быдладорсянь кывсьӧ, норасьӧны йӧз — сёр пӧ зэв «Югыд туйным» деревняясӧ локтӧ. Норасьӧны, корсьӧны, коді сэсь мыжа?

Ме заводитлі жӧ корсьны. Кыдзи нӧ? Зэв ӧд колӧ, мед эськӧ «Югыд туйыд» кӧть ӧдйӧнджык воис (мукӧд газетыд ӧд миянӧдз ёна жӧ сёрмӧны).

Юаси ме редакцияын.

Шуӧны: код лунӧ пӧ петӧ, сійӧ жӧ лунас пӧ газеттӧ ыстам пошта вылӧ.

Пошта дінӧ шыӧдчи: быд мунан паракодӧн пӧ, быд вӧла поштаӧн ыстам газеттӧ, огӧ пӧ кутӧй — шуисны сэні. Эз сюр мыжаыд. Ланьтӧдчывны лои. Ачым эськӧ думӧн пыр корся мыжатӧ...

Сэсся буракӧ ветліг-мунігӧн ӧти мыжа сюри; август тӧлысьын, 16-лунӧ, Пӧддельнӧй дінті муніс паракод «Вымь». Пӧддельнӧйса поштаын уджалысь — Конюков нима — абу эштӧма паракод дорад котӧртлыныд. Паракод шывгис водзӧ. Ветліс Кулӧмдінӧдз, сэсся бӧр лэччигас нин Конюков поштатӧ сэсь босьтіс. Воис и газет Пӧддельнӧйӧ.

Дерт эськӧ, ме ог тӧд, мый понда Конюков ёрт эз эшты паракодӧ лэччывны. Сэсся, бара жӧ, Кулӧмдінӧдзыд абу зэв ылын Поддельнӧйсяньыд. Ӧти лунӧн сӧмын газетыдлӧн туйыд нюжаліс.

А Зеленечса пошта кӧ унмовсьлас паракод мунігад, паракодыд шывгас Котласӧдз. Кымын лунӧн сёрмас газетыд? Меным зэв нимкодь лои, кокниджык быдӧн лои... Кӧть ӧти мыжа морт сюри.

Водзӧ бара на понда корсьны. Гашкӧ, ещӧ на кӧнкӧ эмӧсь мыжаясыс.

Коми йӧзӧс чуксала: отсалӧй меным! Ӧти‐кӧ — мед пошта вылын уджалысьясыс оз узьны паракодъястӧ, колӧ найӧс, коді вермӧ сійӧ вӧчнысӧ (ме ог вермы) садьмӧдны. Мӧд‐кӧ — вайӧ водзӧ ӧтвылысь корсямӧй, дерт на ӧд эмӧсь ещӧ мыжаясыд. Ӧтнамӧн, тыдалӧ, ог вермы «Югыд туйлысь» помӧдз туйсӧ корсьны.

А. С.