МЫЙ ГИЖНЫ ГАЗЕТӦ
Унаысь нин редакция «Югыд туйлӧн» чукӧстчыліс коми йӧз дінӧ газетӧ гижӧм йылысь. Ёна нин висьтавліс, мый понда колӧ быд пельӧсысь ыстыны газетӧ гижӧдъяс олӧм-вылӧм йылысь.
Ме ог тӧд, уна-ӧ воӧ сэтшӧм гижӧдъяс. Сӧмын аддза газетысь — омӧля-шочиника гижӧны крестьяна деревняса олӧм йылысь. Гижнытӧ эськӧ ёна колӧ. Колӧ миянлы тӧдны, кыдзи олӧны-уджалӧны быд пельӧсын. Мӧда‐мӧдлысь сэки пондам велӧдчыны уджавныс. Сӧмын — мый гижныс?
Заводиті ме газетӧ гижны. Гижа ӧтчыд, мӧдысь — оз лэдзны газетад. Дӧзмылі нин редакция вылӧ. Мися, тшӧктӧны гижны, а оз лэдзны. Коркӧ и бара гижсис — печатайтӧмаӧсь. Мӧдысь гижи — бара. Понді мӧвпавны, мыйла нӧ, мися, сідз? Ӧні чайта, со мыйла: колӧ тӧдны, мый йылысь гижныд. Ме гижлі попъяс горшасьӧм йылысь, зэр понда юрбитӧм йылысь — эз лэдзны. Сідзи и коли. Тӧдам нин ставным сы йылысь. Гижи самӧкур вӧчӧм йылысь — эз лэдзны. Ёна нин гижлісны сы йылысь, тӧдам ставным — колӧ ёна сійӧ лёкыдкӧд вермасьны, медся ёна колӧ йӧзсӧ югдӧдны — асьныс дугдасны пуны и юны и енлы юрбитны.
Сэсся ме гижи кооператив йылысь, сельскокӧзяйственнӧй тӧварищество йылысь, Исполком удж йылысь — ставсӧ печатайтісны.
Вӧлись ме гӧгӧрвои — колӧ гижны медвойдӧр, медъёна овмӧс кыпӧдӧм йылысь, выль ногӧн уджавны босьтчӧм йылысь. Мый керӧ Исполком, кыдзи школаын велӧдӧны, кутшӧма нардомъяс уджалӧны, скодъяс мый йылысь сёрнитлӧны, мый шуӧны вӧчны, вӧчӧны-ӧ шуӧм сертиыс, оз кӧ вӧчны — мый понда, — та йылысь колӧ гижны грездъяссьыд. Сэсся бара колӧ гижны, кӧні кутшӧм водзмӧстчӧмъяс, выльӧ кутчысьӧмъяс: кӧні заводитӧны му уджавны уна пельӧ юкӧмӧн, кӧні машинаяс судзӧдӧны, кыдзи судзӧдӧны — ӧткӧн ли, ӧтувтчӧмӧн. Кӧні, кутшӧм удж нуӧдны ӧтувтчӧмаӧсь крестьянаыс, кыдзи выль воссьӧм артельяс, тӧвариществояс уджалӧны, мый бура артмӧ, мый оз кужны вӧчны, коді отсалӧ уджавныс, коді торкӧ уджсӧ, став йывсьыс тайӧ колӧ гижны. Унатор на позьӧ индыны. Сэсся, ме чайта, асьныс гижысьясыс пондасны аддзыны, мыйджык колӧ висьтавны мукӧд крестьяналы ас вӧлӧсьт олӧм йылысь.
Заводитлӧй, коми йӧз, мӧда-мӧдтӧ асьныд велӧдны уджавнысӧ, выль туйяс корсявны газет пыр!
ДЕРЕВНЯСА ГИЖЫСЬ.
