СУДЗӦДАМӦЙ «ЮГЫД ТУЙ»
Коми му миян паськыд. Олам ми, коми йӧз, сьӧд вӧрын. Ылынӧсь гырысь каръяссянь. Омӧля волӧны миянӧдз юӧръяс паськыд вӧльнӧй свет вывсьыс. Омӧля тӧдам ми, мый вӧчсьӧ му вылас. Шочиника кывлывлам, кыдз мунӧ олӧмыс миян Роч му вылын, кыдзи уджалысь йӧз кыпӧдӧны разьсьӧм-пазалӧм овмӧссӧ, кыдзи кыптӧны, вежӧрмӧны уджалысь йӧзыс лунысь лунӧ.
Ещӧ шочджыка кывлам ми, кыдзи мукӧд государствоын олӧны йӧзыс, кыдзи сэні гӧль йӧзыс озыръяскӧд вермасьӧны ас кианыс власьт босьтӧм понда, выль олӧмӧ кутчысьӧм понда.
Кысь нин эськӧ тӧдны, мый бурсӧ вӧчӧны мукӧдлаын. Огӧ нин вермӧй налысь велӧдчыныс, бурсӧ налысь босьтны, на ногӧн тшӧтш уджавны. Весиг ӧд огӧ тӧдӧй ми Коми мусьыс олӧмсӧ. Коми крестьяна оз тӧдны, кыдзи-мый уджалӧны каръясын налӧн бӧрйӧм йӧзыс — Сӧветъяс. Оз тӧдны, кыдзи миян Сӧвет власьт обласьт кузя отсалӧ крестьяналы лӧсьӧдны-кыпӧдны овмӧснысӧ.
Ӧні миян коми деревняыд гызьӧма, оз нин важ моз шы ни тӧв, лӧня узь. Крестьяна садьмӧдчӧны... Босьтчӧны югдӧдны ассьыныс юръяссӧ, босьтчӧны бурмӧдны ассьыныс овмӧснысӧ. Коми деревняясын воссялӧны клубъяс, крестьяна ӧтувтчӧны тӧвариществоясӧ, артельясӧ. Кыссьӧны коми крестьяна югыдлань... Сӧмын зэв сьӧкыд крестьянаыслы туйсӧ аслыныс писькӧдны. Омӧля ӧд найӧ войдӧр велӧдчывлісны. Нига пыддиыд кианыс вӧвлі сӧмын чер да гӧр. Оз тырмы крестьянинлӧн кужӧмыс, тӧдӧмыс.
Корсьӧ сійӧ велӧдысьясӧс, бур туй индалысьясӧс, отсӧг сетысьясӧс. Гӧгӧрвоӧны нин ӧткымын крестьянаыс: медбур отсӧгыс деревнялы — Сӧвет власьт; медбур туйыс выль олӧмлань — велӧдчӧмын.
Гӧгӧрвоӧны крестьяна — велӧдасны учитель да агроном.
Сӧмын ещӧ ӧти велӧдысьӧс, бур туй индалысьӧс коми крестьяна омӧля тӧдӧны. Сійӧ велӧдысьыс — газет. Медпервой, медматі велӧдысьыс — миян «Югыд туй». Коді лыддьӧ «Югыд туй», сійӧ тӧдӧ олӧмсӧ Коми муысь. Сӧмын мукӧдлаысь удж мунӧмтӧ тӧдігӧн, мукӧдлаысь велӧдчӧмӧн позьӧ аслыд бура уджавны. Сӧмын «Югыд туй» пыр коми крестьяна вермасны йитчыны‐кӧртасьны мукӧдласа уджалысь йӧзыскӧд дай мӧда-мӧдыскӧд паськыд Коми муын. Сӧмын «Югыд туй» пыр вермасны велӧдчыны мӧда-мӧдыслысь уджавны, овмӧснысӧ кыпӧдны.
Колӧ став коми крестьяналы, выль бур олӧмлань туй корсьысьяслы, судзӧдны «Югыд туй».
Мед «Югыд туй» лоас быд коми керкаын, мед кужас сійӧ сетны быд коми крестьянинлы думъяс вылас воча бур кыв.
«Югыд туй» лыддьысь.
