БУРСИӦМ СЮРСӦД НОМЕР ГАЗЕТЛЫ

Талун коми йӧз видзӧдӧны асланыс сюрсӧд номер газет вылӧ. Асланым газет, сюрсӧд номер нин петӧ, да ещӧ ас кыв сорӧн. Со кутшӧм олӧм лӧсьӧдіс Сӧвет власьтыд! Важ права дырйи вермис эз кодкӧ мӧвпыштлыны та йылысь? Кысь бара. Сэки ӧд, кор ми вӧлім Вӧлӧгда губерня улын, губерня каръясас оз вӧлі петны газетъясыд, кысь нӧ сэтшӧм оласногнад йӧзыд юрвежӧрасясны. Сэки власьтыслы колӧ вӧлі ёнджыка пемдӧдны йӧзсӧ, мед скӧтъяс моз оласны, сӧмын мед аслыныс вӧлі лӧсьыд овны, пемыд уджалысь йӧз сьылі вылын ислалӧмӧн. Эм тай пӧслӧвича — «каньлы абу пыр йӧввыв», сідзи жӧ Сӧвет власьт пуктіс пом йӧз сьылі вылын ислалӧмлы. Озыр йӧзӧн кыӧм везъяс оръяліс помӧдз. Чераньясыс, кодъяс эз сюрны уджалысь йӧз кипод улӧ, кӧсйӧны вӧлі мукӧд государствоын везъясьны. Сӧмын сэні миян Россияын моз жӧ уджалысьяс орйӧдлӧны везъяссӧ, регыд орйӧдласны помӧдз.

Коми йӧз! Мӧвпыштлӧ бурджыка та йылысь. Тіян костын эмӧсь на черань пиян, попъяс да купечьяс, найӧ ёна на дзугӧны олӧмтӧ. Пырӧ ставныд кооперативӧ да кутчысьлӧ збыльысь чорыда вермасьны накӧд. Найӧс кӧ верманныд, сэки олӧмыд ещӧ лоӧ лӧсьыд.

Судзӧдӧ газетъяс, тшӧктӧ челядьнытӧ лыддьыны керкаын уджалігъясӧн, шойччигъясӧн. Коми кывйӧн лэдзӧм газет ёна восьтас тіянлысь синъястӧ, кыдз вӧлӧм колӧ овнытӧ вӧльнӧй светад. Газетын гижӧны сӧмын буртор йылысь, велӧдӧны, сюсьмӧдӧны, юрвежӧрӧдӧны. Кымын уна лоӧ газет судзӧдысь, сымын ӧдйӧ сюсьмасны пемыд коми йӧз. Газет судзӧдан рӧскодныд, асьныд онӧ тӧдлӧ, вешъяс велӧдӧм ног уджалӧмӧн, олӧмӧн. Дугдӧй поп-дякӧс тшӧгӧдӧмысь, кутчысьӧ ас понданыд ёнджыка тӧждысьны! Мед кык сюрс номерӧ газет вотӧдз эз ло весиг ӧти томджык пемыд морт миян обласьтын, мед лӧсьӧдаласны электричествояс, видз-му уджалан машинаяс! Сӧмын сэки коми йӧз сувтасны ас кок вылас — немечьяскӧд, американечьяскӧд ӧтмоз; коми йӧзлӧн юр вемыс налӧн дорысь абу этша, колӧ сӧмын сюсьджыка босьтчывлыны найӧс вӧтӧдны.

К. П.