ӦТУВТЧӦМӦН КОКНЬЫДДЖЫК

Ёна газетыд деревняӧ колӧ. Уна бур сійӧ висьтавлывлӧ. Сӧмын зэв этша воӧ газетыд сэтчӧ.

Мукӧд деревняад гырысь карса газеттӧ оз и аддзывлыны. Эм кӧ — ӧтик-мӧд велӧдчӧмджык мортлӧн, сэсся учрежденньӧын. Сідз жӧ «Югыд туй» омӧля деревняӧдз воӧ. Этша коми крестьянин на аслыс сійӧс судзӧдӧ. Сы понда омӧля и лыддьӧ газеттӧ. Коркӧ эськӧ лун помнад ли праздникад кӧть и лыддьыштас, да он ӧд котӧрт кытчӧкӧ корсьны сійӧс. Котӧртан, да ӧд ещӧ оз на зэв и сюр.

Волас эськӧ дядьӧыдлы юрас, кӧть пӧ эськӧ судзӧді нин аслым, да вот сӧмын лишкаыс абу. Судзӧдны кӧ, колӧ нин кӧть во кежлӧ ли во джын кежлӧ, мый нин ӧтик тӧлысь кежлад судзӧдан. Сӧмын уна колӧ — 6 шайт ли 3 шайт. Оз ӧд лишав... Сідз газеттӧг дядьӧыд и кольӧ. Позьӧ газеттӧ судзӧдны ӧтувтчӧмӧн. 5−6 морт кӧ ӧтувтчасны, зэв донтӧм сувтас: сӧмын 50−60 ур, сымдаыд быд крестьянинлӧн лишалас буртор вылад. А кутшӧм лӧсьыд лоӧ, оз ков корсьны. Тӧдан, поштаыд кӧ воис, газетыд эм, сӧмын петав орчча керкаад. Ачыд кӧ он куж лыддьыныд, позьӧ ӧтувтчыны кужысь морткӧд — ещӧ бур лоӧ: донтӧм газетыд лоӧ, да-й лыддяс тӧварышыд, кутшӧм юӧръяс воӧмаӧсь паськыд му вывсьыс.