КОМСОМОЛЛӦН ОЛӦМЫС

Абъячойын (Визин карулын) комсомолечьяс кыв вылӧ збойӧсь. Сэтшӧм збойӧсь найӧ и удж вылӧ. Кужӧны ӧд и уджавныс. Тӧдӧны, мый колӧ вӧчныс. Юль тӧлысьын, 13-ӧд лунӧ, Абъячойса комсомолечьяс чукӧрӧн мӧдӧдчӧмаӧсь Калининскӧйӧ (грезд, 7 верст сайын Абъячойсянь). Сэні веськӧдчӧмаӧсь видзьяс вылӧ. Лунтыр ытшкӧмаӧсь том йӧз ӧти пӧрыськодь крестьянинлы. Пиыс сылӧн мунӧма Гӧрд армияӧ, ачыс ӧтка уджалысь кольӧма. Сылы эськӧ ӧтнаслы ковзис лун 7−8 мырсьыны. Ӧдйӧ тай комсомолечьяс уськӧдісны турунтӧ. Пи пыддиыс крестьянинлы ёна и уджалісны.

Сэсся рытнас воисны грездад да собранньӧ на ещӧ вӧчисны. Вель уна йӧз чукӧрмыліс — том и пӧрысь. Эз на вӧвлы грездад татшӧм собранньӧыд! Ёна и кывзісны йӧз комсомолечьяслысь висьтавлӧм. А висьтавлӧны найӧ бурторъяс. Мый шуӧма 13-ӧд съезд коммунистъяслӧн деревенскӧй олӧм йылысь, да ещӧ сельскокӧзяйственнӧй налог йылысь.

Ӧти комсомолеч абу локтӧма ытшкынытӧ, да собранньӧ шуис — абу пӧ лӧсьыд сідзтӧ, оз пӧ ков вунӧдны Гӧрд армияӧ мунысьясӧс да налысь семьясӧ.