НИМЪЯС КОЛӦ ВЕЖЛАВНЫ

Комияслӧн оланіныс шусьӧ ӧні «Коми Автономнӧй Обласьтӧн». Сёрнитӧны олысьяс коми кывйӧн; нимъяс видз-мулӧн, вӧрлӧн, валӧн, сиктъяслӧн, вӧлӧсьтъяслӧн, каръяслӧн быдӧн жӧ коми; йӧз ас костын быдтор нимтӧны комиӧн. Мыйкӧ понда эмӧсь на роч нимъяс, шуам: Усть-Сысольск, Усть-Кулом, Усть-Вымь, Сысола, Вычегда, Сторожевск, Подъельск, Деревянск, Большелуг, Богородск, Серегово, мукӧд. Сідзнад мукӧдыслӧн кык ним — рочӧн и комиӧн. Босьтам областнӧй карӧс. Сійӧс ӧти ногӧн шуӧны Усть-Сысольскӧн, мӧд ногӧн — Сыктывдінкарӧн, либӧ: Усть-Кулом — Кулӧмдінӧн, Усть-Вымь — Емдінӧн, Сторожевск — Шойнатыӧн, Большелуг — Ыджыдвиддзӧн, Богородск — Висерӧн, сідз водзӧ. Сэтшӧм кык пӧвста нимтӧмыд коми йӧзтӧ, тшӧтш рочьястӧ, поводнӧя дзугӧ; гижигъясӧн зэв жӧ абу лӧсьыд. Шуам, нимтӧны «Эжваса олысь», гижӧны «Вычегодский житель». Сідз жӧ письмӧ вылын адресъяс. Шуам, колӧ гижны: Обласьт Коми, Сыктывдінкар, Шойнаты вӧлӧсьт, гижӧны: Зырянская область, город Усть-Сысольск, волость Сторожевская.

Ме ногӧн, кыдзи ми лыддьысямӧй коми йӧзӧн, оламӧй торъя автономнӧй обласьтын, унджыкыс сёрнитамӧй коми кывйӧн, колӧ эськӧ став роч нимъяссӧ вежлавны, водзӧ вылӧ нимтыны коми нимӧн, кыдзи коми йӧзыс нимтӧны.

Тайӧ, ме ногӧн, зэв позьӧ вӧчны, абу сьӧкыдтор, некодсянь пыкӧм оз ков лоны, сӧмын Обисполкомлы та йылысь колӧ сетны гижӧд быд вӧлӧсьтӧ да печатайтны «Югыд туй» газетын, сэсся олысьясыд регыд и велаласны коминад нимтыны, налы сійӧ водзвыв нин тӧдса рочӧн дорсьыд. Каръясын тай нӧ быдлаын вежлалӧмаӧсь нимсӧ став уличаыслысь, мукӧдлысь, сідзи жӧ эмӧсь вежлалӧмаӧсь вӧлӧсьт нимъяс, йӧзыд велалӧмаӧсь да зэв кокньыда нимтӧны выль нимнад, сідз жӧ регыдӧн велаласны и миян коми йӧз.

Меным сэсся унаысь син вылӧ усьлывлӧ, гижӧны миянлысь обласьтсӧ кык ногӧн: Зырянская Область и Коми Область. Мыйла нӧ кык ногӧн, оз ӧмӧй позь лӧсьӧдны кыдзкӧ ӧти ним — «Коми Автономнӧй Обласьт»?

Коми гражданин.