ЛӦСЬӦДЧӦЙ ВЫЛЬ ШКОЛА ВОСЬТІГКЕЖЛӦ

Лыдди ме «Югыд туйысь», таво пӧ миян Обласьтын восьтӧны нёль выль пӧлӧс школа том крестьяналы (школа крестьянской молодёжи). Сэтшӧм кӧ лоас школаыд, кыдзи гижӧмаӧсь, — зэв сійӧ бур деревняад. Гижӧны ӧд, сідз пӧ и пондасны школаас велӧдны, мед пӧ кутасны кужны деревняын уджавны: крестьяналысь овмӧссӧ кыпӧдны, налысь юр вежӧръяссӧ югдӧдны. Татшӧм выль пӧлӧс уджалысьясыд, деревняысь петӧм уджалысьяс, крестьянаыслысь олӧмсӧ тӧдысь уджалысьяс миянлы зэв ёна колӧны. Сы понда, ме чайта, миянлы ставнымлы, коми йӧзлы, ковмас босьтчывны отсавны татшӧм пӧлӧс выль школаыдлы, мыйӧн ми вермам.

Медся войдӧр, ме ногӧн, колӧ со мый йылысь думыштны. Сэтшӧм школаыд воссьӧ сӧмын нёль — зэв этша. Сы понда колӧ сідз вӧчны, мед эськӧ сэтчӧ веськаласны медся сюсь том ныв-зонмыс. Мӧд-кӧ, медвойдӧр колӧ босьтны сійӧ школаас гӧльджык да шӧркоддьӧм крестьяналысь челядьсӧ. Та йылысь колӧ думыштны комсомоллы.

Сэсся, ме ногӧн, ӧнісянь жӧ колӧ сэнъясын, кытчӧ школаяссӧ восьтӧны, Исполкомъяслы корсьны бурджык керкаяс, сэсся индыны бурджык муяс-видзьяс. Медся ёна колӧ ӧні став гӧгӧрвоысь коми йӧзлы вӧчны со мый: висьтавлыны став матігӧгӧрса крестьянаыслы, да и мукӧдлаын сійӧ жӧ колӧ вӧчны, кутшӧм пӧльза вермас лоны сійӧ школаясысь коми крестьяналы. Мед эськӧ быд коми крестьянин гӧгӧрвоис та йылысь. Гӧгӧрвоас кӧ — пондас отсавны. Крестьяна отсӧгӧн выль нёль школаыд вермасны бура уджнысӧ заводитны, вермасны бура уджсӧ нуӧдны.

Нёль школаыс кӧ тайӧ вермасны сувтны чорыда, бура кок выланыс, позяс думыштны водзӧ сэтшӧм школаяссӧ мукӧдлаӧ восьтӧм йылысь.

Сэк миян коми деревняын лоӧ коми уджалысь. Сэк миян коми деревня ӧдйӧджык овмӧссӧ кыпӧдас, сэк деревняын лоӧ выль югыд олӧм.