УДЖАЛӦЙ АРТАЛӦМӦН

Быдласянь Коми муысь кывсьӧ: кооперативъясын пӧ деревняясын абу медколанторъясыс.

Ӧтилаын норасьӧны — абу сов; мӧдлаын шуӧны — чер ни коса кооператив пыр он вермыв судзӧдны, коймӧдлаын йӧзыс истӧгтӧг дзик матайтчӧмаӧсь.

Мыйӧн нӧ эськӧ кооперативъясыс вузасьӧны? Дерт эськӧ, шуам, налӧн и эм мыйсюрӧ коланторъяс. Сӧмын найӧ, тыдалӧ, тӧварсӧ вайигӧн некор оз думыштлыны, оз артавны — мыйта кутшӧм тӧвар вермас ковзьыны крестьянаыслы. Оз артыштны кооперативъяс, кутшӧм пӧраӧ кутшӧмджык тӧвар крестьяналы колӧджык.

Сы понда деревняыд кольӧ колан тӧвартӧг, сы понда кооперативъясад куйлӧмӧн куйлӧ воясӧн ковтӧм тӧвар, кыдзкӧ-мыйкӧ веськалӧма деревняӧ.

Майшасьӧны крестьяна колан тӧвартӧг... Ас кооперативад кӧ абу, гашкӧ, мукӧд вӧлӧсьтын эм? Корсьӧны мукӧд кооперативъясысь — абу. Воштӧны дона пӧрасӧ, кык дон, куим дон спекулянтлы сетасны — мед эськӧ вӧлі коланторйыд. Коді таысь мыжа? Кооператив. Крестьяна видӧны кооперативтӧ.

Видӧмнад тӧвартӧ он судзӧд. Кооперативыд ӧд крестьянаыдлӧн асланыс, асьныс найӧ шленъясыс. Мед найӧ шуасны бӧрйӧм йӧзыслы — правленньӧыслы: уджалӧй юрнаныд, уджалӧй арталӧмӧн, гӧгӧрбок видзӧдлӧмӧн.

Ӧні ӧд миян Коми обласьтын гожся туйӧд судзӧдалӧны тӧвартӧ, пондасны, дерт, и тӧвся туйӧд вайны. Правленньӧяслы колӧ артавны: кутшӧм медся колан кӧлуй, медся колантор крестьяна кӧзяйствоын, деревняын; уна-ӧ сэтшӧм тӧварыс колӧ деревняӧ, уна-ӧ вермас инасьны сэтшӧм тӧвар, сымда и колӧ судзӧдны. Оз ков босьтны мый сюясны да мыйта сетасны Обсоюзын, кытысь деревняса кооператив тӧварсӧ ньӧбӧ. Обсоюзлы, дерт, та йылысь ёна жӧ чорыда колӧ думыштны. Мед Обсоюзыд тӧдӧ, мыйта кутшӧм тӧвар колӧ деревняса кооперативъяслы, налы колӧ водзвыв юӧртны Обсоюзтӧ сы йылысь.

Тадзи, ёна арталӧмӧн сӧмын вермасны кооперативъяс бура вӧчны ассьыныс уджсӧ, вӧлись сэки найӧ мездасны крестьянасӧ истӧгъястӧг олӧмысь.

Р. С.