ВӦЧАЛӦЙ ГӦРД ПОМЕЧЬЯС

Воис вундан кад. Нянь идралӧм — медыджыд мог крестьяналӧн. Коми муын уна эмӧсь гӧль олысьяс: гӧрд салдатъяслӧн семьяяс, инвалидъяс, сирӧтаяс. Налӧн киныс оз судзсьы став уджсӧ нуныс, оз вермыны кадӧ идравны няньсӧ. Идравны колӧ, пӧраыд ӧд оз виччысь. Он кӧ кадӧ чукӧрт няньтӧ — тшыгъявны лоӧ, медбӧръя мӧстӧ ковмас сёйны нянь вылӧ.

Сэтшӧм гӧль войтырыслы колӧ отсыштны, вӧчавны помечьяс. Медвойдӧр татчӧ колӧ кутчысьны комсомоллы, вежӧра том йӧзлы, судзсянаджык крестьяналы тшӧтш. Кӧнсюрӧ (Визинын, Абъячойын) таво турун пуктігӧн комсомолечьяс вӧлі ёна нин отсасьӧмаӧсь гӧль войтырлы. Мыйта найӧ сэсся аттьӧсӧ налы кайтӧны!

Миян коми йӧзыд пемыдӧсь на, оз зэв чепӧсйыны прӧстатӧ уджавны. Важ моз кӧ эськӧ, кор помечтӧ вӧчас кутшӧмкӧ озыр крестьянин, чӧскыда пуас-пӧжалас да помечтӧ вина-сурӧн юкталас — сэтчӧ мырдӧн сюйсьӧны помеч вылад... Сійӧ — кода помеч. Колӧ ӧні вӧчавны гӧрд помечьяс. Ас мывкыд серти отсавны судзсьытӧм йӧзыслы, отсавны прӧста — кытысь нӧ босьтасны гӧлиник салдат гӧтыръяс либӧ сирӧтаяс кода помечыс вылӧ сёян-юансӧ? Сы вӧсна комсомоллы медвойдӧр и колӧ петкӧдлыны быдӧнлы выль нога помечьяссӧ. Комсомол ӧні шусьӧ Ленинскӧй. Тайӧ ыджыд велӧдысь ним кузяыс нин колӧ налы кутчысьны отсавны гӧль войтырлы. Вывті ёна ӧд оз нин найӧ унежитчыны, ӧти праздник лунӧ кӧ ветласны артельӧн вундыны. А нимкодьыс гӧль мортыдлы мыйта!

Энӧ вунӧдӧй вундігӧн, нянь идралігӧн судзсьытӧм войтырӧс!

С.