КОМИ КЫВ МЕДВОЙДӦР

Коми войтырлы войдӧр вӧлі зэв делӧ начальствокӧд сёрнитны. Пырас вӧлі коми мортыд кытчӧкӧ, да лолӧ шыасьныс: комиӧн оз лысьт, рочӧн оз куж прамӧя — кыв-мӧд эськӧ и тӧдӧ рочнад да, яндысьӧ: оз пӧ артмы да серавны кутасны.

Ӧні ставыс сійӧ бӧрӧ кольӧма. Коми кыв Коми муын ӧні лыддьыссьӧ вылынджык роч кыв дорысь. Регыд лоӧ вуджӧдӧма коми кыв вылӧ став Сӧветса законсӧ. Учрежденньӧяс вочасӧн пыр комиӧ пӧртчӧны. Комилы воссис ыджыд, паськыд туй югдӧдчыны, суӧдны мукӧд йӧзӧс, кодъяс миянӧс бура ылӧ нин кольӧмаӧсь.

Ставрочмувывса Исполком (ВЦИК) таво юнь 24-ӧд лунӧ шуліс: быд учрежденньӧын колӧ сёрнитны ас йӧзса кывйӧн (чувашъяс учрежденньӧын — чуваш кывйӧн, вотякъясын — вотяк кывйӧн, комиын — коми кывйӧн). Сідз жӧ шуліс вӧчны миян коймӧд обласьтувса сӧветъяслӧн съезд. Тайӧ лунъясӧ (август 7-ӧд лунӧ) Обласьтувса Исполком тшӧктіс быд учрежденньӧын коми йӧзкӧд сёрнитны комиӧн. Гашкӧ, полӧмысла коми мортыд учрежденньӧад шыасяс на первойсӧ рочӧн; весиг сэки служащӧйяслы колӧ воча шыасьны комиӧн. Оз кӧ куж служащӧйыс комиӧн сёрнитны, колӧ корны коми мортӧс, мед вермис сійӧ роч вывсьыс вуджӧдны (переводчик).

Та йылысь лоӧ ыстӧма быд юралысьлы став учрежденньӧас Коми обласьтын гижӧд (циркуляр).

Сӧвет власьт пыр тӧждысьӧ вӧчны мукӧд сёрниа йӧзлы ыджыд буртор: мед эськӧ гӧгӧрвоисны найӧ став бур вӧчӧмсӧ Сӧвет власьтлысь, мед эськӧ уджалысь йӧзыс ёнджыка топӧдчисны, матыстчисны Сӧвет власьт бердас, мед эськӧ регыдджык петісны важногса олӧмсьыс да кутісны овны кокньыдджыка.

Энӧ вунӧдӧй, коми войтыр, ыджыд бур вӧчӧмсӧ сӧвет власьтлысь! Энӧ кедзовтӧй ассьыныд кывтӧ: ас кывйӧн регыдджык югдам, суӧдам мукӧдсӧ!