АНВАР? ЛЁШКА!

Чукӧртчим ёртъяскӧд кафеӧ. Босьтім шаурма. Сёям. Сёрнитам. Но, кыдзи сёрнитам — шмонитам. Шмоньтӧг оз овсьы да. Кыпаліс интереснӧй тема — кыдзи эрзя ногӧн лоӧны кутшӧмсюрӧ нимъяс. Лиза гарыштіс, менам воча чойлӧн пӧ верӧсыс португалеч, и сійӧс шуӧны Родригоӧн, но став рӧдняыс нимтӧ Дригаӧн. А овыс — Салас. И татӧн кывсӧ сиктсаыд ас ногыс бергӧдӧма: абу Салас, а Госас! Сантяй весиг шаурмасӧ эновтіс да рипмуйтіс: «Дрига Салас эрзя нылӧс гусялас».

Родриго-Дрига — тайӧ мый на?! Дум вылӧ усис, кыдзи челядьдырйи аслам да сӧсед бабъяскӧд видзӧдлывлі гортын мексикаса да бразилияса сериалъяс. Унаӧн натӧг овны оз вермыны. Став уджсӧ шыбитасны, сериалыд заводитчас да. А коръяскӧ бабъяс асланыс сёрниӧ на сюйыштасны ворсысьтӧ. Вӧлі сэні сэтшӧм Пабло. А найӧ ас ногыс сійӧс шуисны — Падла. Буракӧ, эрзя кывйӧн тадзи колӧ висьтавны.

Сэсся син водзӧ сувтіс Пазелки. Сэні буретш муніс ыджыд гаж. Йӧзыс вӧлі тырыс. Зонулов, кыдзи и пыр, вермасисны Тюштя ^Тюштя — ыджыд ӧксы, эрзя войтыр эпосын герой./^ ворсӧмын. Лыа вылӧ ӧта-мӧдныслы паныд сувтісны кык зонка. Кианыс — мыйӧнкӧ небыдӧн тыртӧм мешӧкъяс. Кутісны наӧн гындыны ӧта-мӧднысӧ, а видзӧдысьяс горзісны. Ӧтияс чарзісны «Коля, давай!» Мӧдъяс вӧліны мӧд зонка дор. Медся ёна гораліс ӧти мужичӧй:

— Лёшка! Тышкась! Лёшка, кутчысь! Сувт, Лёшка!

И виччысьтӧг йӧз пӧвстын кыліс чуймӧм нывбаба гӧлӧс:

— Кутшӧм Лёшка? Сійӧс жӧ Анварӧн шуӧны!

Пель пырыс лэдзис сылысь шуӧмсӧ мужичӧйыд, водзӧ горзӧ:

— Лёшка! Лёшка!

Нывбаба бара:

— Тайӧ Анвар! Ме жӧ тӧда. Паныдасьліс нин.

Мужичӧйыд ассьыс дольӧ:

— Лёшка, эн сетчы!

И чӧвтіс нывбабаыдлы:

— Тайӧ менам дядьӧн шуысь, Лёшка.

Нывбабаыд оз лэдзчысь:

— Мыйла нӧ сідзкӧ лёшкаалан сійӧс? Батьыс ӧд казах, и писӧ шуис Анварӧн.

— Эрзя ногӧн — Лёшка! — тшупыштіс мужичӧйыд да нӧшта на ярджыка кутіс горзыны Анвар-Лёшкалы.

Со кыдзи овлӧ!

...Сэсся ми пӧттӧдз на сералім: миян сиктъясын йӧзыс сэтшӧм лӧсьыда кужӧны ӧта-мӧднысӧ пинявны! Но тайӧс мӧдысь нин висьтала.