ВӦТӦН НИСЬӦ ВЕМӦСӦН
Медводдза лун (Вой)
Садьми горӧдӧмысь. Сійӧ кынтіс лолӧс. Повзи да шебраси юр вывті. Видлі унмовсьны. Унмӧй эз лок. Кыски юрлӧс улысь часі. Дас кык час вой. Тайӧ кадӧ ме эг на садьмы. Колӧ гижны тайӧс лоӧмторъяслӧн небӧгӧ. Сэтчӧ мыйсюрӧ пасъявла. Жугыльтчи. Небӧгыс шкапын. А ме — шебрас улын. Крӧватьсянь шкапыс ылын. Со тадзи меным мойвиис. Пасъя лоӧмторсӧ асывнас. Ӧні колӧ узьны. Ме унмовси. Вӧтын аддзи ачымӧс — узя. Шуи отсавны аслым. Босьті книгасӧ шкапысь. Ланьті ме шебрас улын. Воді да унмовси джоджын. Но и но. Вӧтын аддзыны вӧт — артмас крепыд ун. Крепыд унмын ме крепыда вӧтаси. Сійӧ крепыда узис. Матыстчи сы дорӧ. Юалі вӧт йылысь. Сійӧ узис. Ме горӧді. Эз кыв. Медъя. Восьті ӧдзӧс. Сы сайын вӧлі джуджыд джуджда. Эг чеччышт. Кӧсъя тай вӧлі век кежлӧ ланьтны. Косі. Вунӧді, кӧні ме. Юалі крепыд унлысь: «Кӧні ме?» Сійӧ вочавидзис, тані пӧ. Сідз, кӧнкӧ, и эм. Джудждӧдчи. Вӧлі джуджыд. Меным эз кажитчы. Ляпкӧдчи. Крепыд ун крепаммис. Сылы тайӧ кажитчис. Сійӧ лои нӧшта крепыдджык. О! Унмӧй лои крепыдджык. Сійӧс колӧ кокньӧдны. Эз артмы. Ме эг вермы джудждӧдчыны. Ме ӧд абу вӧт. Колӧ мӧвпавны вӧт моз. Вӧт полӧ шыясысь. Крепыд ун полӧ гора шыысь. Крепыдсьыс-крепыд ун полӧ горасьыс-гора шыысь. Колӧ крепыда-крепыда мӧвпыштчывны. Горзыны ме ог вермы. Верма пальӧдны ставнас керкасӧ. Ме восьті ӧдзӧс. Джуджыдсьыс-джуджыд джудждаысь кыпаліс горасьыс-гора шы. Ме шызи. Крепыдсьыс-крепыд ун садьмис. Ме тшӧтш.
Мӧд лун (Удж вылӧ мӧдӧм)
Садьми. Эг, буракӧ. Куйлышта. Ме гажтӧма ышловзи. Гашкӧ и, жугыля. Будильник чарӧстіс да. Чеччи. Мырдӧн пасьтаси. Мысси. Юи кофе. Вунӧді вӧчны яеснича. Кыдзи позьӧ юны кофе яесничатӧг. Шог абу. Ме вӧчи яеснича. Бӧр босьта кывъясӧс. Шогыс эм. Кофе бырӧма. Меным мойвиис. Гӧбӧчын заптӧма уна сёян-юан. Кутшӧм гӧбӧчын? Ме ӧд ола мӧд судтаын. Эг думыштлы. Медъя. Сёя яеснича кофетӧг. Муні лавкаӧ ньӧбны ва. Ньӧби ва. Локті гортӧ. Гортын нин воис юрӧ: позис ньӧбны и кофе. Ваыс вӧлӧма сола. Шемӧсми, мыйла абу дуб. Вунӧді сёйны яеснича. Мӧді удж вылӧ. Лэччи медводдза судтаӧ. Гӧгӧрвои: ола коймӧд судтаын. Прӧвериті. Вӧлӧм, ола нёльӧдын. Лэччи бӧр. Вӧлӧмкӧ, кӧмтӧм. Лифтыд на оз уджав и. Мӧді поскӧд. Коймӧд судтаын паныдалі каньӧс. Ме кӧмтӧм, сійӧ пижамаа. Каньыд шуис, тэ пӧ йӧй, ме сійӧс тадз жӧ нимті. Некор эг кужлы сёрнитны канькӧд. Кайи нёльӧд судтаӧ. Кӧмаси. А пасьтавсьӧма мӧдтор. Восьті шкап. Уджалан кӧлуйӧс нусьӧма пеславны. Уси шогӧ да пӧрӧдчи узьны.
