КЫДЗИ КОЛЛЯЛІМ ВЕЛӦДЫСЬЯСЛЫСЬ ВИТ ВО САЙЫН ПРОФСОЮЗӦ ӦТУВТЧӦМ ЛУНСӦ — КЫВТЫВАЫН

28 лунӧ юль тӧлысьын миянлы, Кывтываӧ, сюри ӧтик газет «Югыд туй», кӧні вӧлі гижӧма, кыдзи пӧ колӧ коллявны тайӧ лунсӧ. Профсоюзса шленъяс чукӧртчылісны и бура кузя сёрнитісны та йылысь. Сёрнитӧм бӧрын шуисны: вӧчны субӧтник — ветлыны ставлы видз вылӧ куртны да ытшкыны. Рытнас сэсся чукӧртлыны став йӧзсӧ, вӧчны торжественнӧй заседанньӧ.

29 лунӧ ставным ветлім видзьяс вылӧ. Видз вылын куртім уджалысьяскӧд тшӧтш, ытшким — ставсӧ уджалім квайт час. Пӧрасӧ коллялім зэв лӧсьыда-гажаа, кияс гадьмытӧдзыс быдӧн, буракӧ, уджалісны.

Рытнас клубӧ чукӧртчисны став посни и гырысь, «нимлуна» и «нимлунтӧм» — уджалысьяс (турун пуктысьяс) вӧліны жӧ, сідзжӧ и челядьяс.

Заседанньӧ вылын вӧчисны куим доклад:

1. Вит вося удж велӧдысьяслӧн — Михеев ёрт.

2. Йӧз костын уджалӧм йылысь — Кондырева.

3. Мый шуис 13-ӧд съезд коммунист партиялӧн — Полев.

Докладъяс кывзӧм бӧрын собранньӧ шуис: «Тайӧ вит вонас союзӧ ӧтувтчӧм велӧдысьяс ёна вежӧрнас быдмисны, налӧн синъясыс югдісны, найӧ аддзисны туй выль бур олӧмлань.

Чайтам, водзӧ став велӧдысьясыс пондасны мунны ӧтвылысь коммунист партиякӧд да комсомолкӧд. Ӧтвылысь накӧд пондасны кыпӧдны-нуӧдны гӧль йӧзсӧ выль олӧмлань коммунист партияӧн индӧм туйӧд».

Собранньӧ бӧрын чукӧртісны сьӧм гырысь школаясын коми велӧдчысьяслы.

Педь Саш.