СУСЕДКО ДА ВӦВЪЯС ЙЫЛЫСЬ
— Батьӧй тайӧс висьтавліс. Найӧ сэки Торопок дорын олісны. Кедзовтіс еджыд кӧбыласӧ суседкоыс. Сійӧ кӧ ӧд кутшӧмкӧ вӧлӧс оз радейт — ок и лёк. А кодӧс радейтӧ — локтан, да бурысьыс ставнас кӧсаа. Батьӧй и шуӧ: асывнас кор он пыр, кӧбылаыс быгзьӧма, и вом дорас быг. Мӧдӧма батьӧй Егор дорӧ, висьталӧма шогсӧ, мый пӧ вӧчны, ог тӧд. А мӧдыс и шуӧма, тэ пӧ кыйӧд сійӧс. Мун сэтчӧ вой шӧрланьыс, корсь бурджык места, мед ставсӧ аддзан. Пуксьы, босьт сийӧссӧ да мӧдарӧсӧ бергӧд, пунас ассяньыд. Сийӧс пырыд, зонмӧ, кӧть кутшӧм лёк вын аддзан. А мӧд ногсӧ сійӧ оз тыдав.
Мунас батьӧй гортӧ, некодлы нинӧм оз висьтав. Пасьтасяс шоныдджыка. Пась, гын сапӧг, киас — гӧна кепысь. И мӧдас.
Локтас места вылӧ. Босьтас сийӧс. Бергӧдас сійӧс и пондас виччысьны. Дыр виччысяс, кынмыны кутас. Гӧгӧр лӧнь. Вӧвъяс сулалӧны, турун сёйӧны. Тӧлысь югъялӧ. Кыдзьяс нюраинын гыӧртӧмаӧсь. Думыштас батьӧй, ылӧдліс пӧ Егор. И сійӧ здукас вӧвъясыд кутасны педзны да лапйӧдлыны торгӧдӧм пельяссӧ, нырнас стойлаӧ пырӧны. Мӧдас батьӧй пемыдас дзоргыны. Нинӧм быттьӧ и абу. А сэсся казялас: сюръя дорас кодкӧ легӧ. Ичӧт сэтшӧм, кепысь ыджда кымын. А мыйӧн сюръя дорсьыд вешъяс, вӧлӧмкӧ, морт. Эстшӧм дзоляник мужик. Мӧдас вӧвъяслань. Пася, шапкаа, гырысь кепыся, гын сапӧга. Коскас гӧрд вӧнь кӧрталӧма. Виччысьтӧг сійӧ шыбитас кисьыс кепысьсӧ. Ӧддзӧдчас — да веськыда еджыдыслӧн мыш вылас. Кӧбылаыд чужъяс, да веськыда майӧгъясӧ. А мӧдыс бурысяс нин тшапитчӧма да лӧсьӧдчӧ сермӧдавны. Дыр мырсяс. Кӧбылаыд оз лэдз да. Но суседкоыд век жӧ сермӧдалас. Домӧдыс ^Дом — узда./^ босьтас да йӧрсьыс петкӧдас. Вӧлӧм, вӧв кыскалан бӧчка дорӧ. Доддялас — и йӧрдан дорӧ вӧтлас. Ватӧ ӧдйӧ ваяс. Нюраинӧ кисьтас да бара йӧрданлань тӧвзяс. Вӧвлы лолыштнысӧ оз лэдз.
Батьӧй шуас велӧдны суседкотӧ. Мӧд луннас босьтас ыджыд напаръя да вӧчас бӧчкаын розь. А войнас бара пырас важ местаас да сийӧс пырыд мӧдас кыйӧдчыны. Воддза войыс моз жӧ ставыс лоас. Сӧмын суседкоыд мунас да дыркодь оз лок. Батьӧй пукыштас. Сэсся ветлас гидняӧ, бӧръяс кузьджык орс да юлань мӧдас. Петас кыр йылӧ. А вӧлыд сулалӧ йӧрдан дорын. И ведраыс сэтчӧ-татчӧ, сэтчӧ-татчӧ. Суседкоыд, буракӧ, зільӧ. А сямыстӧ абу. Мужик сямыс. Оз гӧгӧрво, мыйла ваыс оз во. Кисьтасигкостіыс ваыс кынмӧма, вӧлыс да доддьыс йизьӧмаӧсь, и ачыс тшӧтш. Батьӧй босьтӧма орстӧ, матыстчӧма дай пӧвсавны мӧдӧма. А дзоляыдлы он на веськав орснад, мӧдыс пескылясьӧ да. Батьӧй думыштас да воропнас ырыштчас. А суседкоыд гӧгӧрвоас, чеччыштас гын сапӧгсьыс да кӧмтӧг нюраинас и пышъяс.
— Но, дед, тэ и сӧрыштін!
— Мыйла сӧрышті? Батьӧй ӧтырышъя миянлы гын сапӧгсӧ мыччӧдлывліс — со эстшӧм дзоляник. Чуньлыс ыджда. И дорсӧ вурӧма. Кокбӧрля весьтас гӧрд серпас.
