ШУВГЕЙ
Папирос куритігмоз лӧдсалім пач. Софронычьяс пиысь медся ичӧтыс, ньӧжмыд мужик, йӧмкӧ пуксьӧма, тушаыс дженьыд, юрыс пельпомас вӧйӧма, кокыс кузь, киыс кузь, видзӧдӧ наяна, лӧсьӧдчӧма вӧвлӧмтор висьтавны... Кывъяс вуджрасьӧны нин вӧсни льӧб дортіыс, син пельӧссяньыс чукыръяс мӧдісны, нырыс водзын, синмыс ылын.
— Вӧлі тайӧ важӧн, Иртыш дорын ми олім. Чери кыянінсянь локтім. Вадйын миян вӧлі ез пуктӧма. Дзонь тыв гумлалім, ставыс эстшӧм сын. Но и шуим гортӧ нуны, жар вӧлі да. Мунам, ю нин вуджам. И код тӧдас мыйысь ваыс серӧссис. Туруныс сьӧдӧдіс, костасис, кыркӧтшсьыс лыа мӧдіс сюръя моз ва кузя — гумыльга! И веськыда миянлань. А пыжным лишнӧй грузитӧма, кык чунь вомлӧс ваӧдзыс. Лӧнь юӧд полӧмпырысь кывтім, а сійӧ дзик пыж шӧрланьыс локтӧ. Тані ме пуртӧсысь кватиті пурт да вомӧнӧн и лыйи. Шувгейыд ^В книге Г. Райшева «Сибирские бывальщины» вихорь трактуется как мифический образ. Данному образу в коми мифологии соответствует шувгей — опасный для жизни и здоровья человека нечистый ветер, вихрь./^ и боквыв кежис.
Пырим вискӧ, водзӧ мунны ог вермӧй: полӧмсьыс эбӧстӧммим.
Сэксянь унакодь кад колис — ме гӧтраси нин, батьысь торйӧдчи. Сійӧ воас батьӧй висьӧдчис да ыстіс менӧ, ветлы пӧ ме пыдди Тобольскӧ.
Самӧловӧн кыйӧма осётрӧс. Сыысь унджыксӧ некод эз кыйлыв. Кыдзи сэксянь нимтісны миянӧс самӧловъясӧн, сідзи и пысасис.
Ме кӧсйыси. Аслам чериыс сэки вӧлі нёль кымын додь.
Черитӧ вузалі, бур нажӧтка лои. Тобольскын кабакыд тырмымӧн вӧлі. Пукалам инӧ кабакын. Видзӧдам: мӧдар пельӧссяньыс миянлань мужик веськӧдчӧма. Матыстчис, сувтіс да висьталӧ:
— Он тӧдмав?
— Ог тӧдмав, — шуа, — гашкӧ, ям кутан керкаын...
Сійӧ сулыштіс, сэсся бара юалӧ:
— Он и тӧдмав?
— Ог, — шуа.
Сэки сійӧ перйис пуртӧссьыс пурт да пызанӧ сатшкис.
— Тэнад? — шуӧ.
— Менам, — шуа.
Пуртыс ӧд нима вӧлі. А сійӧ пуджис соссӧ да рана петкӧдлӧ. Шуӧ, не кӧ тайӧ, шоммӧдінныд эськӧ Иртышсӧ. И бӧр муніс.
Ме тӧварышкӧд сылы мышкас видзӧдам. Ён вӧлі мужикыс. Пыр мышкас видзӧдім, а кыдзи пельӧсӧдзыс воис — эг аддзылӧй. Кутім дзӧръявны — некӧн абу.
Шувгейыс йӧзсӧ нинӧмӧ воштӧ, а ловъяссӧ аслыс босьтӧ, висьтавліс дедӧй. Омӧльыс да Енмыс ӧтторъя вермасьӧны ловъяс вӧсна. Сэксянь ме шувгейсьыд зэв ёна пола. Тӧндзи Марусякӧд муртса бара эг сюрӧй, бур кӧть, веретяыс кос вӧлі, чеччыштім. Орччӧн муніс, турун кузя.
