ПЫЖ

1


Пӧрысь пыж
Шонтіс ордлысӧ шонді водзын.

Ми Колькакӧд
Пышйим детдомысь
Да олім пыж улас
Вежон.

Меным вӧлі дас арӧс,
Нёль тӧлысь да квайт лун.
Колькалы тырис
Пыжас дас ӧти.

Пыж миянӧс шонтіс,
Ыштӧкӧ мам.
Ылысяньыс сійӧ чайтсис
Му вылын куйлысь
Сьӧд нывбабаӧн.
Ми быйкнитлім
Пыж кынӧм увсьыс,
Быттьӧ выльӧн чужысьяс.

Визувтіс чӧскыд ю.
Юмов кӧрӧн ӧвтіс турун.
А небыд бобӧнянь юр
Мӧс вӧра йӧв моз
Мавтыштліс вом дорӧс.

2


Вежон мысти детдомын,
Еджыд стенъяса чижовкаын,
Сиралӧм чагъяс моз куйлім
Еджыд прӧстыня вылын —
Сы выйӧдз чишкаліс шондіыс.
Вадорын эновтӧм
Пӧрысь пыжлӧн
Челядь.

Кызь во мысти,
Кор ме виччысьтӧг аддза тэнӧ,
Локтас ме дорӧ
Тайӧ кывбурыс:

Тайӧ нылыс
Мыйӧнкӧ мунӧ
Ю шӧрын лайкъялысь
Вылын ныра кокни
Пыжлань.
Восьласнас.
Дӧлалысь платтьӧнас.
Еджыд чышъяннас.

Джуджыд турун пиӧд келігӧн
Платтьӧыс оз сайӧд
Векни лядьвейсӧ.
Кыдзи и пыж,
Сійӧ йиджтӧ ас пиас
Турун кӧрсӧ
Да юлысь лӧзсӧ.

А лун шӧрнас,
Пӧттӧдз шполькӧдчӧм бӧрын,
Куйлӧ шонді водзын
Лӧз ю дорын.
Яйсӧ чашйӧма
Гӧрд эжӧрӧн,
Кыдзи и пыж,
Юрсяньыс кок улӧдз.

3


Пыжъяс оз кувны...

1946 воын
Кык ён мужичӧй
Кералісны йӧрас
Пыж.
Ыджыд
Гӧгрӧс
Шыльыд пуысь.
Пыжыс эштіс.
Сійӧс лэптісны
Пельпом выланыс
Да нуисны
Сикт кузя
Ю дорӧ.
Выль пыж! —
Горзісны ӧшиньӧд
Мужичӧйяс да бабаяс.
Выль пыж!
Выль пыж! —
Чеччалісны челядь.
Пыжсӧ нуисны
Пельпом выланыс,
Кинас сывъялӧмӧн
Нёль-ӧ-вит мужичӧй.

Тайӧ пыж улас,
Гашкӧ, и дзебсям
1949 вося
Гожӧмын?

4


Ме эг вунӧд
Сылысь кӧрсӧ:
Сир, шонді, ва,
Ытшкӧм турун,
Ма да бипур сора.

«Абу пыж, а
Бать-мамтӧм челядьлы
Ӧввӧдан сьыланкыв!
Ыджыд Кӧшлӧн
Либӧ Сизима Кодзувлӧн
Карнан помын
Ошалысь потан!» —
Тадзи эськӧ ме гижи,
Збыльысь кӧ тайӧ эз вӧв.

Менӧ сайкӧдісны
Пӧрысь да эндӧм пыжъяс:
Пукала му вылын,
Нёровтчи на бердӧ юрӧн.