КАД НИН, КАД, ЁРТЪЯС!

Уна на миян коми йӧз сӧвет власьтлысь удж вӧчӧмсӧ оз тӧдны, оз тӧдны, кодлы сӧвет власьт зільӧ сетны кокньӧд. Ме со мыйла шуа. Коми обласьтын важӧнкодь нин чорыда кутчысисны удж нуӧданінъяс вочасӧн дзикӧдз комиӧ пӧртны. Сы йылысь эз нин омӧля газетын коми йӧзлы висьтавлыны. Вӧлӧмкӧ, унджыкыс на коми йӧз оз тӧд нинӧм та йылысь. Локтасны сиктъяссянь карӧ удж нуӧданінъясӧ (учрежденньӧясӧ) могӧн, кужӧны кӧть оз, рочӧн кутасны сёрнитны. Сійӧ ӧд мый на!. Тайӧ лунъясӧ воліс миян удж нуӧданінӧ могӧн пӧрысь баба Зеленечысь. Аскӧдыс вайӧдӧма писӧ. «Ачым рочӧн ог куж; пиӧс лои вайны сёрнитны». Татшӧм мича поводдя дырйи абу дзик донтӧм крестьянинлы лун воштӧмыд. Колӧ висьтавлыны коми йӧзлы быдлаын — собранньӧяс вылын, сёрни костын коми кывйӧн сёрнитӧм йылысь.

Медъёна, регыдджык, пырысьтӧм-пыр, колӧ аслыным удж нуӧданінъясын ас костын заводитны комиӧн сёрнитны, петкӧдлыны коми йӧзлы збыльысь сӧвет власьтлысь тайӧ удж вӧчӧмсӧ.

Кад нин, кад, ёртъяс!