ДУГДӦ КОМИ КЫВ КЕДЗОВТӦМЫСЬ

Унаысь лоӧ кывлыны, мыйла пӧ бара лӧсьӧдӧны коми литературасӧ, сюйӧны учрежденньӧясӧ коми кывсӧ? Унджык коми йӧзыс нин пӧ кужӧны рочӧн, сы понда пӧ колӧ роч кывсӧ ёнджыка сюйны йӧз пӧвстас.

Та йылысь ме кӧсъя неуна сёрнитыштны. Босьтам первой каръясын олысь рочьясӧс. Унджыкыс на пиысь шуӧны, коми кыв пӧ некытчӧ оз шогмы, мисьтӧм, весиг асьныс коми йӧзыс яндысьӧны ас кывйӧн сёрнитны. Найӧ, дерт, мӧд ног оз шуны, ас кывйыд ӧд быдӧнлы муса, сӧмын миян эмӧсь неуна велӧдчыштӧм войтыр, кедзовтӧны ас кывтӧ. Мый понда нӧ тайӧ кедзовтӧмыс? Веськыда кӧ шуны — тшапныс понда. Ми ӧд эгӧ на вунӧдӧ, кыдзи важ права дырйи коми служакъясыд, наставничаясыд нырнысӧ лэптӧмӧн вӧлі видзӧдӧны пемыд коми йӧзыд вылӧ. Рочӧн кужтӧм йӧз дінысь вӧлі ӧтдортчӧны, олӧны торйӧдчӧмӧн. Коми йӧзлы на дорӧ матыстчыны вӧлі зэв сьӧкыд, оз вӧлі матӧ сибӧдны. Воысь воӧ пемыд коми йӧз рочӧн сёрнитысьястӧ кутісны чайтны ёна быдтор тӧдысьясӧн, начальствоӧн, сы понда кутісны повны, яндысьны, ас дорсьыс вылӧ найӧс пуктыны. Тадзӧн ньӧжйӧник чужи коми кыв кедзовтӧм. Ӧні сӧвет власьт мездіс посни ас кывъя йӧзӧс. Сеталіс налы автономияяс: уна ас кывъя йӧз уджалӧны ас литература лӧсьӧдӧм вылын. Миян обласьтын татшӧм уджыс мунӧ жӧ, сӧмын зэв ньӧжйӧн. Дзугӧны унаысь асланым жӧ велӧдчыштӧм йӧз. Найӧ рочьяскӧд тшӧтш ёна на важ моз кедзовтӧны ас кывтӧ, шуӧны, некыдз пӧ он велав коминад гижны, лыддьысьны, сэтшӧм пӧ сьӧкыд. Ме ногысь абу тадзи. Коми мортыдлы абу жӧ нин бара ас кывнад сьӧкыд сёрнитнытӧ, лыддьысьны да гижны сідзи жӧ, сӧмын колӧ лыддьыны коми газет да велӧдчыштны гижны вежон-мӧд — сӧмын ставыс. Колӧ дугдыны роч кывнад коми пемыд йӧз водзын ныр лэптӧмысь, коми газетъяс, нигаяс шыблалӧмысь. Газет да нига кедзовтӧмыд — пемыд коми йӧзсӧ кедзовтӧм кодь жӧ. Вунӧдӧ важ сардырся олӧмтӧ, кутчысьӧ выль ног олӧмӧ, сӧвъявмӧдӧ (ёнмӧдӧ), югдӧдӧ сиктъясын олысь пемыд йӧзӧс!

П.