КАНДЫКЪЯС

Тувсовъя вӧрын чӧв-лӧнь. Пуяс ӧдва нин вермӧны кутны вожъясаныс ӧшйӧм лымсӧ. Муыс йиджтӧ васӧ, юӧ бӧрддзӧдӧм тӧвлысь синвасӧ. Гырысь мольяс югъялӧны гож водзын. Найӧ шогалӧны нисьӧ нимкодясьӧны, дасьтысьӧны выльысь чужигкежлӧ. Му веркӧсас быттьӧ дона изъяс койӧма. И на костын йӧктӧны рӧшкыд кока кандыкъяс. Кодкӧ писькӧдчӧ шоль пыр, турунвиж юрнас енэжлань турыштчӧмӧн. Кодкӧ чолӧмасьӧ тулыскӧд лӧз юрнас копрасьӧмӧн. А кор кандыкыс уна — лолыд тырлӧ! Быттьӧ вольсыштчӧма енэж рӧма кокни джодждӧра. Найӧ шоныдӧсь нисьӧ кӧдзыдӧсь. Окота ӧдйӧджык ӧктыны. Ньӧжйӧник нетшкан дзоридзсӧ то ӧтилаысь, то мӧдлаысь. Медтыкӧ джодждӧраыс оз розьӧссьы. Ме бӧрын мӧд морт локтас. И тшӧтш нимкодясьыштас.

Нюмбана кандыклӧн

Коскыс вӧсни, нюдз.

Копрасьны йӧз водзын

Оз тай сійӧ мудз.

Радейта кандыклысь

Кольмӧдана дук.

Медым сійӧс кывны,

Копыртчыла тшук.