ВӦРСА ГӦСТЯ

Кӧдзыд вӧрын воссьысь тувсовъя дзоридзьяс пӧвстысь, ачым ог тӧд мыйла, медся ёна радейта медуница. Сійӧ абу мукӧдыс кодь. Босьтам лымдорчача кӧть кандык. Медуницалӧн кыз кокас лысьтан кутчысьнысӧ — оз чег. Ме гежӧда ӧкта тувсовъя медводдза чветтӧ. Сӧмын кор уна да синтӧ пӧртӧны, вӧзйысьӧны пашкыр букетӧ.

Медуницаяс тшӧкыда быдмӧны ӧтчукӧрӧн. Некымын дзоридз быттьӧ ӧти китыр. Со и ме лажыньтча на водзын, меліа дзигӧда да юрӧс копыртӧмӧн видла апыштны тувсовъя кӧрсӧ. Но налӧн кӧрыс абу. Гашкӧ, сӧмын ме сідзи кыла? Найӧс кытшалӧ мулӧн дукыс. Пасьтӧм, эбӧстӧм, тӧвся мойдысь мынӧм мулӧн. А нӧшта сылысь лымлӧн да чужысь кӧйдыслӧн. Тайӧ чветъясас — абу сӧмын вӧр-валӧн садьмӧм, но и олӧм зумыдлунлӧн, ставсӧ ловзьӧдысь Мулӧн пас. Дзоляник юръясыс то енэж, то сирень рӧмаӧсь. Эз-ӧ гожся садъясысь найӧ воны татчӧ кадысь водз? И мыйысь ме найӧс радейта? Медводдза шоныдысь? И кытысь найӧ тӧдӧны тайӧс?

Мыйла ме юася? Ӧти медуница кыськӧ быйкнитіс менам дача йӧрын! Да ӧд медся лёк местаас — шыбитӧм кирпич чукӧр костын (ог слӧймы ставсӧ идравны). Дерт, мешайтчысь гырысь кирпичсӧ ме пырысьтӧм-пыр и вешті бокӧ. И мӧд вонас нӧшта некымын медуница сэні быдмис. А коймӧд вонас найӧ ӧтлаасисны пашкыр букетӧ. Зэв на и мичаа видзӧдсисны кирпич жуглас костын.

Таво орччӧн мыччысис кыдз. Мыйӧн сійӧ лёкджык? Ӧні ме гӧгӧрвоа: тайӧ му лестукыс лоас менам дзоляник вӧр діӧн. Эз ӧд весьшӧрӧ некымын во тыртӧмав. Муыд оз радейт лоны кушӧн. Кӧйдыс кӧ усяс — бытьӧн чужас. Меным аслым окота тӧдны, кодъясӧс нӧшта виччысьны? Да и коді миян пӧвстын гӧсьтыс — ме либӧ найӧ? Абу-ӧ ставным гӧсьтъяс миян Муын?