ОЛӦМ ВЫН

Мортыс вочасӧн мырддьӧ вӧрлысь унджык и унджык места, сюйсьӧ пыдӧджык и пыдӧджык. И чинӧмӧн чинӧны муса чужан пельӧсъясыд, кодъясӧс тӧдан и радейтан ичӧтдырсяньыд. Пыр тшӧкыдджыка виччысьтӧг зурасян техникаӧн парсалӧм Му эшкынӧ. А мый дыра на ковмас бурдӧдны дойяссӧ?

Тайӧ вӧрас менам вӧлі тӧдса кушин, дай зэв на озыр. Сэні маслениккӧд да ягсеркӧд лӧсяліс весиг пув. Тусьӧн-тусьӧн вӧлі чӧсмасям, дыркодь кисьмӧ да. Коркӧ ме тӧдмалі, мый и тайӧ кушиныс абу нин важ кодьыс. Сійӧ буретш выль лесотехническӧй овмӧскӧд орччӧн. Дінтіыс мунігӧн ме смелмӧдчи да кежи видлыны кушинӧс. Важысянь нин кӧсъя тайӧс вӧчны, но ог лысьт, пола сьӧлӧмӧс нормӧдны.

Кушинӧс збыльысь вӧлі пегралӧма. Неыджыд пуяс пыдди кольӧмаӧсь мыръяс. Быдлаын куйлісны увъяс да пу колясъяс, уджалысьясӧн шыбитӧм кӧрлӧдлӧм банкаяс да ротас. Но кушин мӧдар пельӧсас, шочмӧдӧм вӧр дорланьыс, менӧ виччысис козин. Важ мыр гӧгӧр, коді быттьӧкӧ видзис на воддза вӧрзьӧдлытӧм вӧрыслысь лов шысӧ, чукӧртчӧмаӧсь кушинысь став олысьыс.

Матын-матын, но ӧта-мӧдныслы шондіӧн нимкодясьны мешайттӧг, шойччисны масленикъяс. Черань везъя, йӧнгыльӧсь вож улын ме казялі визьӧн быдмӧм йӧла ельдӧгъяс. А медся ёна чуймӧдіс пув. Сійӧ быдмис эз сӧмын нитшсялӧм важ мыр дорын, но и йылас. Гӧрд вотӧса юртас зымвидзис парсалӧм кушин весьтын. Нетшыштны тайӧ вир тусьяссӧ, сёйны эз вӧв окота. Быттьӧ найӧ лоисны зумыд вӧр-валӧн пасъясӧн.

Тайӧ и шусьӧ олӧм вынӧн. И тайӧ выныс, гашкӧ, вермас мездыны оз сӧмын вӧрсӧ, но и миянӧс.