ВӦРСА КОЗИН

Сійӧ лунас ми батькӧд дыр келалім вӧрӧд куш кӧрзинаясӧн и некыдз эг вермӧй тыртны найӧс. А ӧд тайӧ местаас пыр тшакыс быдмӧ. Кежам шӧр туй вывсьыс миян ордымӧ, воам татчӧ, пӧттӧдз ӧктысям и — гортӧ. Тшаксӧ ӧд весавны на ковмас. Та вӧсна колӧ чукӧртны, мыйта верман пуны. Нокыс нӧ мыйта! И бӧрйыны, и весавны, и мыськавны. А сэні... быд тшаклӧн аслас туй: кодӧс солавны, кодӧс пражитны, кодӧс косьтыны. Ӧти кывйӧн, тайӧ вель ыджыд удж.

Мый сійӧ лунас лоис? Кос корйысь артмӧм быд мыльк улӧ видзӧдлім. Аддзам рӧчтор, кӧні туруныс чурвидзыштӧ, копыртчам сылы, ньӧжйӧника лэптыштам, мед оз дзугсьы вӧрса эшкыныс, а сэні — теш: пожӧм коль либӧ кутшӧмкӧ вуж. Бӧр лэдзам шебрассӧ да водзӧ мунам корсьны. Тӧдам: вӧрыс вӧсна колӧ тӧждысьны. И сэки сійӧ отсалас. Тэ кӧ сы дорӧ бурӧн, сійӧ нӧшта унджык бурсӧ сетас. Мый сэки лёксӧ вӧчим, ог тӧдӧй, но вӧрыд миянӧс эз кыв. Тшакыс этша. Тӧдлытӧгыд тальыштан, кылан ратшмунӧмсӧ, а со сійӧ — кор улын ельдӧг: еджыд либӧ сьӧд, кӧть кутшӧм. Копыртчан уртшакла либӧ иванчикла, бурджыкыс оз сюр да, а ыкша еджыд гоб пукалӧ орччӧн, юрсӧ чатӧртыштӧма, мыччасьӧ, казяласны оз, миянкӧд дзебсясьӧмысь ворсӧ. Быттьӧ кодкӧ кимӧститчӧма тані. Мырсим-мырсим да шуим водзӧ мунны, выль местаяс тӧдмавны.

Коркӧ кад заводитчис чуркйӧсь места. Чойясыс абу ыджыдӧсь, но джуджыдӧсь, крутӧсь. Татшӧмъясті тӧвнас эськӧ челядьлы даддьӧн исласьны. Кайим ӧти чурк йылӧ, а сэні... серакотша серпас: тшап сьӧд ельдӧг; бархат юбкаа еджыд ельдӧг; шонді моз дзирдалӧ гажа аньпель да ставныс вӧсна нимкодясьӧ; рам ягсер сы дорын оз тыдав, быттьӧ быгалӧма; уртшакыс лыдтӧм-тшӧттӧм; иванчик котыр гӧгӧр сідз и кыскӧ йӧктыштны киын пуртӧн. Муртса вылынджык виж гобъяс масленикъяскӧд вензьӧны, коді на пиысь медся бурыс. Тадзи ӧти чурк йылын и тыртім кӧрзинанымӧс. Нӧшта ӧти гуся места ӧні миян лоис. Эз пырысьтӧм-пыр Муыс сійӧс восьты. Оз быдӧнлы эскыны вермы. Гӧгӧрвоим ми сэки, мыйла вӧрыс сиптысис. Сійӧ миянлы выль местаяс кӧсйис петкӧдлыны! Эскӧ, сідзкӧ. Аттьӧ сылы таысь!