СЮСЬ БУТУЗ
Гожӧмнас ме сизим арӧса пикӧд кӧртымалі матысса сиктын дача. Паныд сулаліс серӧдӧм ставеня ичӧт пелькиник керка. Сэні оліс пӧль. Сійӧ водзті ёна вӧравлӧма. И ӧні быд лун кык-куим час шӧйтіс вӧрӧд кӧть кутшӧм поводдя дырйи. Сійӧс век колльӧдіс Бутуз — гӧрд кузь гӧна пон. На вылӧ видзӧдан и он гӧгӧрво, кодныс ёнджыка виччысьӧ вӧрӧ мунӧмсӧ: ставныс бӧрся вӧтлысьны радейтысь Бутуз либӧ мичаа серӧдӧм беддя авъя косіник пӧль.
Антон пӧльлӧн соседыс вӧлі лэптӧ выль керка. Быд лун неыджыд телегаӧн сійӧ вайліс ӧтка мортыдлы пачсӧ ломтыны кымынкӧ пӧвтор да кольліс туй дорас. Тӧвнас ӧд пачыд радейтӧ нямыштны. А веж кӧдзыд дырйи быд чаг дона. Сиктын йӧзыс тшӧкыда отсалӧны ӧта-мӧдныслы. Вӧрӧ мунтӧдзыс Антон пӧль век пыртліс «песторсӧ», кыдзи сійӧ меліа шуис пӧвъяссӧ, йӧрас. Бутуз бергаліс орччӧн, котраліс кӧзяин бӧрсяыс да гартласис кок улас, нач сямтӧм пон.
Ӧти лунӧ Антон пӧль манитчис град йӧрас. Сиктад уджыд век тай уна. Бутуз дыр чеччаліс пӧвъяс гӧгӧр да увтчис, кор нин пӧ вӧрас мӧдам. Буракӧ, вежӧрас пансис кутшӧмкӧ сьӧкыд туй: пон тшапкис пиньнас ӧти пӧвтор да кутіс бӧрыньтчыны сыкӧд гортланьыс. Пӧвйыс ыри-зули кыссис турун вывті скӧрысь чеччалӧмӧн.
Ме кори пиӧс — пондім видзӧдны ӧтлаын. Табанитчигас Бутуз конъясис тагӧсӧ. Но сійӧ эз лэдзчысь ни вомсӧ эз восьты, а пыртіс сьӧкыдторсӧ восьса ӧдзӧсӧд. Денискаӧй, шань сьӧлӧма да, эз вермы кутчысьны — котӧртіс отсавны зіль понлы. Кыкнад уджыс ӧдйӧ и эштіс. Нимкодьысла пон гажаа никсіс да гартчис менам пи гӧгӧр. Дениска вӧрзьӧдчас — Бутуз вылӧ-вылӧ чеччыштлас. Понлы явӧ кажитчис выль ворсӧмыс.
Тадзи куим тӧварышыс и кутісны лӧсявны. Пӧль, зонка да пон. Торйӧн кажитчис налы ӧтлаын ветлывлыны вӧрӧ. Быд пӧрйӧ вайлісны гортӧ вотӧс да тшак тыра кӧрзинаяс. Некымынысь и менӧ босьтлісны. Вӧрас нин гӧгӧрвои, мый Бутуз йылысь первойсӧ лёка думайтсьӧма. Сійӧ, вӧлӧмкӧ, тӧлка да шань пон. Абу ӧд весьшӧрӧ шусьӧгыс артмылӧма: «Кодкӧд олан, сылысь и велалан». Йӧзыслы шусьӧгыс лӧсялӧ жӧ. Но и пон йылысь позьӧ тадзи висьтавны. Торйӧн налы, кодъяслӧн кӧзяеваыс вежӧраӧсь да уджачӧсь.
