МУДЕР ПЫШКАЙ

Миян чипанъяс дорӧ вельмӧм пышкай волӧ шыдӧс кокавны. Ывлаын гожӧмнад майбыр, сёяныд тырыс. Весиг карын став лэбачыс пӧтӧсь. А тайӧ пышкайыс торйӧн сюсь: пырас курӧг позйӧ, лясниысь кокыштас мый шедӧ и бӧр лыйыштӧ. Чӧскыд вом! Петук сійӧс первойсӧ быттьӧ эз и казяв. Эз слӧймы, кӧнкӧ. Вывті нин ӧдйӧ пышкайыс лэбыштас кӧрт сеткаӧн потшӧм сарайысь. Ӧдзӧсыс век восьса, а лясниыс буретш пыраніныслы паныд, гож водзын.

Сэсся, видзӧда да, пышкайыд кутіс пуксьывлыны лясни дорышас да бӧрйыны чӧскыдджык тусьяс. Ӧні петук дӧзмис нин да видзӧдчис котшкыны дзоля шышлы юр пыдӧсас. Но мӧдыс вӧлі сэтшӧм вертлян — Петя эз и сяммы кокыштнысӧ. Вочасӧн шыш дорӧ ставныс велалісны, и дзоля лэбач мӧдіс вердчыны нинӧмысь повтӧг. Курӧгъяс чашка гӧгӧр сулалӧны, а пышкай чеччалӧ дасьтӧм сорас вывті, кольк кышсӧ оз босьт. Ачыс синма картупель кодь: сійӧс быттьӧ мусьыс выльӧн на перйӧмаӧсь, а пыркнитны вунӧдӧмаӧсь. Сораснас кӧ лякӧссяс, тусьӧсь вижӧдӧм ӧгуреч кодь лоас. Окота эськӧ чипанъяслы сійӧс кокыштны, видлыны, чӧскыд-ӧ. Но ӧгуречыд вывті ӧдйӧ чеччалӧ — судзӧдчыны сыӧдз абу кокньыд.

Мукӧддырйиыс вая чипанъяслы юмовторъя дозмук, а пышкай пукалӧ нин да виччысьӧ. Яндысьтӧм син кӧ-а? А талун пӧдругасӧ нин вайӧдӧма. Регыд миян оз курӧг поз, а пышкай поз лоас!